Qazaqstan Týberkýlezge transshekaralyq baqylaý boıynsha Áreketter josparyn tanystyrdy
ASTANA. QazAqparat - Qazaqstan Týberkýlezge transshekaralyq baqylaý júrgizýge arnalǵan áreketter josparyn usyndy.
Bul týraly búgin Astanada Ortalyq Azııa elderiniń eńbekshi mıgranttar arasynda týberkýlezge qarsy kúres júrgizý jónindegi aımaqtyq yntymaqtastyǵyna arnalǵan baspasóz máslıhatynda málim boldy.
JITS, týberkýlez jáne bezgekke qarsy kúresýge arnalǵan jahandyq qordyń qarjysy esebinen DDSU, Halyqaralyq kóshi-qon uıymy, Qyzyl Krest jáne Qyzyl Jarty aı qoǵamdary halyqaralyq federatsııasymen seriktese júzege asyryp otyrǵan HOÝP (Project HOPE) jobasynyń baǵdarlamasy Keshendi josparǵa qoldaý kórsetip, eńbekshi mıgranttar eń kóp shoǵyrlanǵan elimizdiń 7 óńirinde júzege asyrylýda. Arnaıy iriktelip alynǵan medıtsınalyq uıymdar barlyq mıgranttarǵa týberkýlezdi dıagnostıkalaý jáne emdeý boıynsha qyzmetterdi kórsetetin bolady.
«Bıylǵy jyldyń 19-20 qarasha kúnderi aralyǵynda Astanada Qyrǵyzstan, Tájikstan, Ózbekstan jáne Reseı ókilderiniń joǵary deńgeıdegi kezdesýi ótti. Kezdesý kezinde Keshendi jospar aıasyndaǵy qujat, ıaǵnı taıaý jylǵa arnalǵan Áreketter jospary nemese Jol kartasy qabyldandy. Bul qujatta qabyldaýshy el aýmaǵynda jáne de óz otanyna oralǵannan keıin mıgranttar arasynda týberkýlezdi dıagnostıkalaý jáne emdeý maqsatynda júrgiziletin sharalar qamtylǵan. Ortalyq Azııa elderiniń ókilderi de Áreketter josparyna óz tolyqtyrýlaryn engizgenin atap ótkimiz keledi», - dedi Qazaqstandaǵy Project HOPE ókili Bahtııar Babamýradov.
Spıkerler atap ótkendeı, týberkýlezge shaldyǵýǵa jaǵdaı jasap otyrǵan negizgi sebepter retinde mıgranttardyń osy dert týraly habardarlyq deńgeıiniń tómen bolýy, ómir súrý sapasynyń tómendigi jáne qoǵam tarapynan qoldaýdyń joqtyǵy yqpal etýde. Qabyldanǵan Áreketter josparyna sáıkes, taıaý 12 aıda jumys úsh baǵytta júrgiziletin bolady. Birinshiden, mıgranttar arasyndaǵy týberkýlezge qarsy kúresý máseleleri jóninde aımaqtyq nemese ekijaqty memleketaralyq negizgi kelisimdi daıyndaý. Ekinshiden, Ortalyq Azııa aımaǵynda mıgranttar arasyndaǵy týberkýlez týraly aqparattarmen almasý tetigin ázirleý qamtylǵan. Al úshinshi baǵyty - mıgranttardyń baratyn elinde olardyń dıagnostıka jáne emdeýmen baılanysty kómekterge júginýin yntalandyrý maqsatynda mıgranttardyń ózderi turyp jatqan elden shyǵar aldyn olarǵa «qoldaý kórsetýshi ortany» qurý, ıaǵnı mıgranttar arasynda týberkýlezdi dıagnostıkalaý jáne emdeý kezinde týyndaýy múmkin kedergilerdi joıý úshin qyzmetterdi usyný.
Sonymen qatar, mıgranttardy aqparattandyrý jáne aǵartý, olarǵa áleýmettik qoldaý kórsetýge arnalǵan is-sharalardy júrgizý, týberkýlezdi emdeýge qatysty normatıvtik qujattardy daıyndaý nemese olardy qaıta qarastyrý josparlanyp otyr.
Aıta keteıik, «Project HOPE» Densaýlyq saqtaý qory (HOÝP jobasy) Týberkýlezge transshekaralyq baqylaý júrgizýge arnalǵan áreketter josparyn nemese jol kartasyn daıyndaýmen tikeleı analysqan halyqaralyq úkimettik emes uıym.
