Qazaqstan tsıfrlyq quqyqty Ata zańda bekitken sanaýly eldiń biri – zańger
ASTANA. KAZINFORM – 1 shildede kúshine engen jańa Konstıtýtsııa eldegi tsıfrlyq quqyqtyń saqtalýyn bekemdeı túspek. Mundaı oıdy Konstıtýtsııalyq Sot janyndaǵy Ǵylymı-konsýltatıvtik keńestiń múshesi Mıras Dáýlenov aıtty.
Onyń sózinshe, Jańa Ata zańda tsıfrlyq quqyq, kıberqaýipsizdik, derbes derekter men zııatkerlik menshikti qorǵaýǵa erekshe nazar aýdarylǵan.
– Qazaqstan tsıfrlyq quqyqtyń zamanaýı talabyn konstıtýtsııalyq deńgeıde rettegen álemdegi alǵashqy ári sanaýly eldiń biri bolmaq. Mundaı norma buǵan deıin Portýgalııa, Brazılııa jáne Domınıkan Respýblıkasynyń konstıtýtsııalarynda kórinis tapqan. Atalǵan elderde derbes derekterdi qorǵaý men tsıfrlyq quqyqtardy qamtamasyz etý máselesi konstıtýtsııalyq deńgeıde bekitilgen edi, – deıdi zańger.
Mıras Dáýletovtiń paıymdaýynsha, mundaı qadam – tsıfrlyq memleketti damytýdy strategııalyq basymdyq retinde tańdaǵan elderge tán úrdis. Kóp memlekette tsıfrlyq quqyq erejesi tek jekelegen normamen ǵana shekteledi, al Qazaqstan quqyqtyq negizdi Ata zańda bekitti.
– Memleket basshysy tsıfrlyq quqyqqa erekshe kóńil bólip otyr. Úsh jyl buryn jarııalanǵan Qazaqstandy tsıfrlyq memleket retinde damytý reformasy jemis berýde. Jańa Konstıtýtsııanyń qabyldanýy bul baǵytqa jańa serpin beredi, – dep qosty spıker.
Maman qaı Konstıtýtsııalyq reformanyń qoǵam ómirine eń kóp áser etetinin boljady. Onyń aıtýynsha, Parlament pen jergilikti basqarý júıesindegi ózgerister sheshýshi ról atqarýy múmkin.
– Konstıtýtsııa qabyldanǵannan keıin zańnamalardy jańa erejelerge sáıkestendirý boıynsha keshendi jumys júrgiziledi. Eń aldymen memlekettik qurylymda, saılaý júıesinde jáne Parlament qyzmeti men sot júıesinde ózgeris bolady. Sondaı-aq jergilikti ózin-ózi basqarý, tsıfrlyq quqyq, derbes derekterdi qorǵaý, azamattardyń qoǵamdyq ómirge qatysýyna qatysty zańnamalyq aktiler qaıta qaralady, – dep atap ótti Mıras Dáýletov.
Spıker alǵashqy naqty nátıje qajetti zańdar qabyldanyp, jańa ınstıtýttar jumys bastaǵannan keıin-aq baıqala bastaıdy degen senimde. Konstıtýtsııalyq reformany tolyqqandy júzege asyrý birneshe jylǵa sozylýy yqtımal. Óıtkeni quqyqtyq júıe men memlekettik basqarý salasy Konstıtýtsııada bekitilgen jańa qaǵıdaǵa kezeń-kezeńimen beıimdelýi qajet.
