Qazaqstan Tsıfrlyq qoǵamdyq ıgilikter alıansyna qosyldy
ASTANA. KAZINFORM — Qazaqstan Birikken Ulttar Uıymynyń qoldaýymen qurylǵan Tsıfrlyq qoǵamdyq ıgilikter alıansynyń (DPGA) múshesi atandy. Bul týraly Parıjde ótken Alıans músheleriniń jyl saıynǵy kezdesýinde jarııalandy.
Qazaqstannyń Alıansqa qatysýyna Jasandy ıntellekt jáne tsıfrlyq damý mınıstrligi men «Ulttyq aqparattyq tehnologııalar» AQ qoldaý kórsetedi. El halyqaralyq uıym aıasynda memlekettik basqarýdy tsıfrlandyrý tájirıbesimen bólisip, birlesken jobalarǵa qatysýdy jáne tsıfrlyq qoǵamdyq ıgilikterdi ázirleý men engizý boıynsha halyqaralyq tájirıbeni zerdeleýdi josparlap otyr.
Qazaqstan Alıans jumysyna úsh negizgi baǵyt boıynsha úles qospaq
Birinshisi — jasandy ıntellekt negizindegi tsıfrlyq qoǵamdyq ıgilikterdi zertteý. Bul baǵytta Azııa damý bankimen jáne BUU ýnıversıtetimen birlesip, ashyq ári qoljetimdi JI júıelerin ázirleý jáne taratý boıynsha zertteýler júrgizilip, tıisti usynymdar synaqtan ótkiziledi.
Ekinshisi — ashyq bastapqy kodqa negizdelgen tsıfrlyq sheshimderdi ilgeriletý. Qazaqstan óz ázirlemelerin Tsıfrlyq qoǵamdyq ıgilikter standartyna sáıkestendirip, halyqaralyq deńgeıde taratý múmkindikterin qarastyrady.
Úshinshisi — áleýetti arttyrý jáne bilim almasý. Qazaqstan «50-in-5» halyqaralyq naýqany aıasyndaǵy tájirıbesine súıene otyryp, tsıfrlyq memlekettik basqarý júıelerin ázirleý men paıdalaný jónindegi bilimimen basqa eldermen bólisýge daıyn.
«Ulttyq aqparattyq tehnologııalar» AQ elektrondyq úkimet ınfraqurylymy men Ulttyq jasandy ıntellekt platformasynyń ulttyq operatory retinde osy baǵyttarǵa tehnıkalyq jáne praktıkalyq qoldaý kórsetedi.
Qazaqstan Respýblıkasy Jasandy ıntellekt jáne tsıfrlyq damý birinshi vıtse-mınıstri Rostıslav Konıashkınniń aıtýynsha, Alıansqa múshe bolý elge tsıfrlyq sheshimderdiń qoljetimdiligin arttyrýǵa, olardy qaıta paıdalanýdy keńeıtýge jáne memlekettik qyzmetterdiń sapasyn jaqsartýǵa úles qosýǵa múmkindik beredi.
Al Tsıfrlyq qoǵamdyq ıgilikter alıansy Hatshylyǵynyń bas dırektory Lıv Marte Nordhaýg Qazaqstannyń qosylýy azamattardyń múddesine baǵdarlanǵan tsıfrlyq memlekettik basqarýdy damytýǵa jáne halyqaralyq yntymaqtastyqty nyǵaıtýǵa yqpal etetinin atap ótti.
Aıta keteıik, Tsıfrlyq qoǵamdyq ıgilikter alıansy — BUU qoldaýymen qurylǵan halyqaralyq bastama. Ol ashyq bastapqy kodqa negizdelgen baǵdarlamalyq qamtamasyz etýdi, ashyq derekterdi, jasandy ıntellekt modelderin, standarttar men kontentti damytýǵa jáne taratýǵa baǵyttalǵan. Mundaı sheshimder derbes derekterdi qorǵaý talaptaryna saı bolyp, zııan keltirmeýi jáne BUU-nyń Turaqty damý maqsattaryna yqpal etýi tıis.
Buǵan deıin AI-Quryltai jasandy ıntellekt platformasynyń kómegimen alǵash ret zań jobasy ázirlengenin jazǵanbyz.