Qazaqstan tsıfrlyq derekterdi zań júzinde múlik retinde moıyndamaqshy

ASTANA. KAZINFORM — Májiliste Tsıfrlyq kodeks jobasy men oǵan ilespe eki zań jobasy qaralyp jatyr. Qujattardy Ekonomıkalyq reforma jáne óńirlik damý komıtetiniń hatshysy Ekaterına Smyshlıaeva tanystyrdy. 

Jańa Tsıfrlyq kodeks tsıfrlyq ortaǵa quqyqtyq mártebe berip, derekter men platformalardy aınalymǵa engizýge arnalǵan. Osylaısha tsıfrlyq derekter, júıeler, resýrstar men ınfraqurylym quqyq obektisi bolyp tanylady.

— Kodekstiń negizgi bólimi tsıfrlyq quqyqtar uǵymyn aınalymǵa engizedi. Olardyń mynandaı eki túri bolady:

— aınalymdaǵy tsıfrlyq quqyqtar — tsıfrlyq qarjy aktıvteri jáne taýarlyq tsıfrlyq aktıvter.

— qol jetimdilikti, paıdalanýdy jáne basqa da materıaldyq emes múmkindikterdi usynatyn ýtılıtarlyq tsıfrlyq quqyqtar.

Bul norma naqty sektordy tokendeýge jáne tsıfrlyq aktıvter naryǵyn odan ári damytýǵa negiz jasaıdy. Tsıfrlyq derekter aınalymynyń quqyqtyq rejımi engiziledi. Jazbalar túrindegi tsıfrlyq derekter alǵash ret quqyq obektisi retinde tanylǵaly otyr. Bul degenimiz, derekter ekonomıkalyq qundylyqqa ıe bolyp, azamattyq negizdegi aınalymǵa qatysa alady, — dedi depýtat.

Aıta ketý kerek, Qazaqstanda tsıfrlyq kodeks qabyldaý máselesi 2022 jyldan beri aıtylyp kelgen edi.