Jaslan Madıev Beıjińdegi Huawei ǵylymı-zertteý ortalyǵyna bardy
BEIJІŃ. KAZINFORM – Qazaqstan delegatsııasynyń Qytaıǵa saparynyń iskerlik baǵdarlamasy aıasynda Qazaqstannyń Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Madıev Beıjińdegi Huawei ǵylymı-zertteý ortalyǵyna resmı saparmen baryp, Huawei kompanııasynyń vıtse-prezıdenti jáne halyqaralyq úkimettik baılanystar jónindegi prezıdenti Tonnı Baomen kezdesti.
Kezdesý barysynda Jaslan Madıev pen Tonnı Bao tsıfrlyq tehnologııalar men tsıfrlyq ekonomıka salasyndaǵy sońǵy úrdister men múmkindikterdi talqylady.
«Jasandy ıntellektti, bulttyq tehnologııalardy jáne basqa da ozyq sheshimderdi damytý – bizdiń tsıfrlyq transformatsııamyzdyń basym baǵyttary. Búgin talqylaǵan jobalar elimizde atalǵan tsıfrlyq tehnologııalardy damytýǵa baǵyttalǵan úlken áleýetti kórsetip otyr. Álemniń alpaýyt tehnologııalyq kompanııalarmen yntymaqtastyq bizge aqyldy qalalar qurýǵa, memlekettik qyzmetterdiń tıimdiligin arttyrýǵa jáne bıznes úshin jańa múmkindikterge jol ashady», - dep túıindedi Jaslan Madıev.
Huawei kompanııasy Qazaqstanda 26 jyl boıy jumys istep keledi jáne Qazaqstannyń aımaqtyq tsıfrlyq ortalyq qurý baǵytyndaǵy turaqty damýyna yqpal ete otyryp, senimdi uzaq merzimdi seriktes bolyp qala beretinin málimdedi.
