Qazaqstan tsıfrlandyrý salasynda Nıderlandyǵa úlgi bola alady – Elshi
ASTANA. KAZINFORM – Qazaqstan men Nıderland arasyndaǵy saıası-ekonomıkalyq baılanys jyldan-jylǵa nyǵaıyp keledi. Búginde Nıderland elimizdegi eń iri ınvestorlardyń biri sanalady. Ásirese aýyl sharýashylyǵy, tsıfrlandyrý, jasyl tehnologııalar men bıznes salalaryndaǵy áriptestik jańa deńgeıge kóterilip keledi. Bul jóninde Nıderland koroldiginiń Qazaqstandaǵy Tótenshe jáne ókiletti elshisi Nıko Shemers Jibek Joly telearnasyna suhbat berdi.
Óz suhbatynda dıplomat Qazaqstan men Nıderland qarym-qatynasy turaqty ári óte jaqsy deńgeıde ekenin atap ótti.
– Otyz jyldan astam buryn ornaǵan aradaǵy saıası dıalogqa kóp ýaqyt óte qoıǵan joq. Bul aralyqta Nıderland Qazaqstannyń tikeleı ınvestorlarynyń birine aınaldy. Sý resýrstaryn basqarý, tsıfrlandyrý, agroónerkásip, densaýlyq salalarynda óte jaqsy qarym-qatynasty nyǵaıtyp kelemiz. Muny aıtý men úshin úlken mártebe, – dedi Nıko Shemers Jibek Joly telearnasynyń «BÚGІN.Live» baǵdarlamasynda.
Ásirese agroónerkásip salasynda eki eldiń seriktestigi basym. Nıderland Qazaqstan aýmaǵynan 66 ese kishi bolǵanymen, agrosalany jaqsy damytqan jáne dúnıe júzinde ekinshi ımporter atanǵan.
– Bul salada Qazaqstannyń da áleýeti óte zor dep oılaımyz. Sondyqtan osy salada jaqsy seriktes bolsaq, tutas álemdi tamaqpen qamtamasyz etetin deńgeıge jeterimizge senimdimin. Sosyn 2024 jyly kóktemgi sý tasqyny bolǵanda Nıderland kómekke jetken alǵashqy elderdiń qatarynda boldy. Óıtkeni biz ol jaǵdaıdy jaqsy túsinemiz, ózimiz de sý tasqyny máselesin bastan keship otyrmyz. Sondyqtan osy salalarda jaqsy seriktes bola alamyz, – dedi elshi.
Osylaısha, eki el arasynda sý resýrstaryn basqarý, medıtsına, jańartylatyn energııa, munaı-gaz salalarynda óte jaqsy seriktestik bar.
– Sırek kezdesetin jer metaldary da basty baǵytta. Mendeleev elementteriniń barlyǵy derlik Qazaqstannan tabylady. Budan bólek, Qazaqstannyń JI jáne tsıfrlandyrý salasynda óte qarqyndy damyp kele jatqany baıqalady. Qazir Qazaqstannyń jastaryna úlken múmkindik berilip jatyr. Kóptegen jańa ortalyqtar ashyldy, jas mamandar men balalar tsıfrlandyrý baǵytynda bilim alyp júr. Bul baǵytta Qazaqstan bizdiń elge úlgi bola alady. Ásirese, Elektrondy úkimet platformasy maǵan óte unaıdy. Óte aýqymdy jumys eGov arqasynda júrgizilip keledi, – dedi N.Shemers.
Suhbat sońynda dıplomat Qazaqtan týraly alǵashqy áserin aıtyp berdi.
– Men 2023 jyly elshi bolyp keldim. Árıne, eń birinshi sýyq klımatqa tańǵaldym. Qazaqstannyń sýyǵy Eýropa elderine qaraǵanda basqasha. Degenmen ǵımarat ishindegi jylý úzdiksiz berildi. Oǵan qosa, qazaqtyń dalasy keń baıtaq. Nıderlandyda velosıped alyp, dittegen jerime 15 mınýtta jete alamyn. Al Qazaqstanda mindetti túrde kólik kerek. Qazaq halqynyń qonaqjaılyǵy da birden sezildi. Eki halyqtyń aıyrmashylyǵynan góri uqsastyqtaryn jıi baıqadym. Biz de kóshpendi halyq bolǵanbyz. Qazaqtar keń dalada kóship-qonsa, Nıderland halqy muhıttar men sý betinde kóshti. Bul derekterdi maqtanyshpen aıtamyn, – deıdi Nıderland elshisi.
Eske sala ketsek, ótken aptada Jambyl oblysynda «Qyzǵaldaq mura – 2026» festıvali ótti. Onda Nıderland Koroldigi 40 myń qyzǵaldaq pııazshyǵyn tabystady.
