«Qazaqstan» TRK «Ómirge úmit syıla» aktsııasyn bastaıdy

ASTANA. QazAqparat - Búgin, 9 qyrkúıek kúni «Qazaqstan» Respýblıkalyq teleradıokorporatsııasy Qazaqstan Respýblıkasy Densaýlyq saqtaý mınıstrliginiń respýblıkalyq transfýzıologııa ǵylymı-óndiristik ortalyǵymen birlese otyryp, «Ómirge úmit syıla» atty aktsııasyn bastady. Korporatsııanyń árbir qyzmetkeri óz erkimen Qazaqstannyń donorlary qataryn tolyqtyrýǵa múmkindigi bar. Bul týraly korporatsııanyń baspasóz qyzmeti habarlady.

Korporatsııanyń árbir qyzmetkeri qan tapsyra otyryp, ıgilikti is jasaıdy. Bul adamnyń júregindegi meıirim men izgilik qasıetterin oıatyp qana qoımaı, densaýlyǵyna da jaqsy áser etip, tán men jannyń úılesimdilikte bolýyna yqpal etedi.

Kóbinese, qandy qashan tapsyramyz? Týǵan-týystarymyz nemese dostarymyz aýrýhanaǵa túsken jaǵdaıda nemese kómek suraǵan kezde ǵana tapsyramyz. Qalǵan jaǵdaılarda bul máselege mán bermeımiz. Atalǵan aktsııa erteńgi kúndi búgin oılaýǵa shaqyrady.

«Qazaqstanda jyl saıyn 200 myń lıtr qoıytylǵan qan, 80 myń lıtr plazma, 60 myń lıtr quramynda erıtrotsıti bar orta jáne shamamen 18 myń trombokontsentrattyń emdik dozalary daıyndalady. Biraq ta donorlyq materıaldaǵy 100% paıyz qajettilikti jabý úshin atalǵan kólem óte az. Bul rette, árbir qazaqstandyqtyń donorlyq sanalyǵy sheshýshi ról atqara alady. Durys sheshim qabyldap, qan tapsyryńyz. Ózińizdi donor bolýǵa ıtermeleńiz. Qazirgi tańda Qazaqstanda árbir 1000 aýrýǵa 18 donordan keledi, al Batysta bul kórsetkish 40-tan 60-qa deıin jetedi.

Sońǵy 20 jyl ishinde Qazaqstannyń donorlar sany 2 ese qysqardy. Buǵan sebep te kóp. Alaıda qan donory atanýǵa eshqashanda kesh emes», - delingen habarlamada.

Donor bolam degen ár bir azamat oblystyq jáne Astana, Almaty qalalaryndaǵy 23 qan ortalyǵynyń birine qan tapsyryp, donorlyq qozǵalysqa óz úlesin qosa alady.

250-450 ml. qan tapsyrǵan saý adamǵa bul kórsetkish densaýlyǵyna da, ómirine de zııan keltirmeıdi, kerisinshe qanshama adamnyń ómirin qutqaryp qalady.

Adamnyń densaýlyǵyna qan tapsyrý óte paıdaly. Bul ferrıtındi tómendetý arqyly júrektiń ıshemııalyq aýrýlarynan saqtaıdy, sebebi ulpadaǵy artyq temir mólsheri jiti koronarlyq sındromnyń belgisi bolyp tabylady. Erıtropoezdi shıratady (qannyń qyzyl jasýshalarynyń jańarýy), ulpalyq metabolızmdi jáne gaz almasýdy jaqsartady. Qan aınalymyndaǵy toksınderdiń basym bóligi qanmen birge joıylady.

18 jasqa tolǵan, medıtsınalyq tekseristen ótken, saý jáne qan tapsyrýǵa nıet bildirgen Qazaqstannyń ár bir azamaty donor bola alady. Donor budan buryn aýyrǵan nemese qazirgi kezdegi dertteri týraly habarlaýǵa mindetti.