«Qazaqstan» TRK fýtboldan ÁCh matchtaryn zańsyz kórsetkenderdi sotqa berýde
ASTANA. QazAqparat - «Qazaqstan» teleradıokorporatsııasy Reseıde ótken Álem chempıonatyn zańsyz kórsetkenderdiń ústinen 30-ǵa tarta aryz túsirdi, dep habarlaıdy QazAqparat tilshisi.
«Bizdi naqty ári qatal túrde óziniń jáne FIFA-nyń múddesin qorǵaı alatynyn elderdiń biri ekenimizdi FIFA-da da atap ótti. Men bul jerde buzýshylyqtardyń tirkelýi týraly aıtyp otyrmyn. Bizdiń korporatsııanyń mobıldik toptary matchtardy qoǵamdyq tamashalaý oryndaryn aralady. Eger ol jerde Álem chempıonatynyń oıyndary «Qazaqstan» jáne «Qazsport» telearnalarynda kórsetilmeıtin bolsa, bul faktiler tirkelip otyrdy. Eskertýler jasaldy. Eger bul jaǵdaılar qaıtalanyp jatsa, ıaǵnı máselen belgili bir meıramhana nemese kópshilik jınalatyn oryn matchty zańsyz kórip jatsa, polıtsııany tartý arqyly ákimshilik akt jasaldy», - dedi OKQ-da ótken baspasóz máslıhatynda «Qazsport» telearnasynyń dırektory Pavel Tsybýlın.
Onyń aıtýynsha, kópshilik jınalatyn orynda ÁCh matchtaryn zańsyz kórsetkender sotqa beriledi.
«Barlyq quqyq biz jaqta. Álem chempıonatynyń qorytyndysy boıynsha 30-ǵa jýyq aryz beriletin bolady. Mine, biz úshin sondyqtan Álem chempıonaty áli aıaqtalǵan joq. Sondyqtan, talapty buzýshylar isterińizdi jalǵastyra berińizder. Biz áli sizder arqyly aqsha tabatyn bolamyz», - dep sózin ázilmen aıaqtady Pavel Tsybýlın.
Al «Qazaqstan» teleradıokorporatsııasynyń Basqarma tóraǵasy Erlan Qarın buǵan baılanysty óziniń pikirin bildirdi.
«FIFA-men otyrǵan kelisim boıynsha fýtbol matchtaryn qoǵamdyq orynda tamashalaýdyń barlyǵy tek «Qazaqstan» jáne «Qazsport» telearnalary arqyly júzege asyrylýy kerek. Bul - qazaqstandyqtardyń barlyǵy da osy arnalardy kórý kerek degen sóz emes. Tek qoǵamdyq tamashalaý oryndary - meıramhanalar, dámhanalar týraly aıtylyp otyr. Adamdardy demalyp match kóresizder dep shaqyryp alǵandar basqa arnalar arqyly matchtardy taratatyn bolsa - bul zań buzýshylyq bolyp esepteledi. Bizde quqyqtyq mádenıet endi ǵana damyp kele jatyr. Onyń bári úshin jaza qarastyrylǵanyn kóp adam bile bermeýi múmkin», - deıdi Erlan Qarın.
Pavel Tsybýlınniń aıtýynsha, QR Zańyna sáıkes avtorlyq quqyqtyń buzylǵany úshin zańmen qýdalanady.
Eske sala ketsek, fýtboldan Álem chempıonatynyń fınalynda Frantsııa men Horvatııa quramalary kezdesip, Frantsııa jeńiske jetken edi.
Illıýstratsııalyq foto
