Qazaqstan «TRIPP halyqaralyq beıbitshilik pen órkendeý joly» jobasyna qyzyǵýshylyq tanytady

ASTANA. KAZINFORM – Qazaqstan «TRIPP halyqaralyq beıbitshilik pen órkendeý joly» jobasyna qatysýǵa qyzyǵýshylyq tanytyp otyr. Bul týraly Memleket basshysy Qasym-Jomart Toqaev Armenııa Premer-mınıstri Nıkol Pashınıanmen kelissózderden keıingi brıfıngte aıtty.

- Kelissózde elderimiz ónerkásip, kólik-logıstıka, energetıka, aýyl sharýashylyǵy, tsıfrlandyrý, qurylys jáne basqa da salalardaǵy seriktestikti damyta alatynyna nazar aýdarylyp, sonyń ishinde kólik-tranzıt baǵytynyń áleýetin tıimdi paıdalanýǵa basa mán berilgen, - dedi Prezıdent.

Memleket basshysy Ońtústik Kavkazdaǵy jańa geosaıası ahýal ekijaqty jáne aımaqaralyq yntymaqtastyqty nyǵaıtýǵa qolaıly jaǵdaı týǵyzyp otyrǵanyn aıtty.

- Qazaqstan Armenııanyń kólik-tranzıt salasyndaǵy «Beıbitshilik qıylysy» bastamasyn qoldaıdy. Sondaı-aq biz «TRIPP halyqaralyq beıbitshilik pen órkendeý joly» jobasyna qatysýǵa qyzyǵýshylyq tanytyp otyrǵanymyzdy rastaımyz. Osy strategııalyq dálizderdi Transkaspıı halyqaralyq kólik baǵdarymen jáne Soltústik-Ońtústik dálizimen ushtastyrý eki eldiń de múddesine saı keledi, – dedi Qasym-Jomart Toqaev.

Aıta keteıik, Qasym-Jomart Toqaev pen Nıkol Pashınıan kelissóz qorytyndysy boıynsha Birlesken málimdeme qabyldady.