Qazaqstan treonın men glýtamat boıynsha álemdik naryqtarǵa shyǵady
ASTANA. KAZINFORM — Qazaqstan treonın men glýtamat boıynsha álemdik naryqtarǵa shyǵady. Bul týraly Memleket basshysy Qasym-Jomart Toqaevtyń tóraǵalyǵymen ótip jatqan Úkimettiń keńeıtilgen otyrysynda Premer-mınıstr Oljas Bektenov aıtty.
— Aýyl sharýashylyǵy ónimderin tereń óńdeý salasyn damytý — mańyzdy baǵyttardyń biri. Máselen, bıyl Jambyl oblysynda júgerini tereń óńdeýge arnalǵan iri ónerkásiptik park iske qosylady. Bul Qazaqstanǵa treonın men glýtamat boıynsha álemdik naryqtarǵa shyǵýǵa múmkindik beredi. Onyń ústine jańa zaýyt jyl saıyn 3 mln tonna kóleminde júgerige kepildik berilgen suranysty qalyptastyrady. Al, qazir búkil Qazaqstan boıynsha nebári 1 mln tonna júgeri ósiriledi, ıaǵnı, bir ǵana zaýyt naryq qurylymyn ózgertip, agroóndiristiń jekelegen baǵyttarynyń damýyna qýatty serpin beredi, — dedi Oljas Bektenov.
Úkimet basshysynyń dereginshe, 2025 jyly maıly daqyldardy, júndi, et pen sútti tereń óńdeýge, sondaı-aq qurama jem men shyryn óndirýge arnalǵan 6 kásiporyn iske qosyldy. Sonymen qatar agroónerkásip kesheninde on zaýyt salynyp jatyr. Alaıda salanyń áleýeti budan áldeqaıda joǵary.
— Bul oraıda Úkimet tereń óńdeý jobalaryna arnaıy memlekettik qoldaý kórsetip keledi. Mysaly, astyqty óńdeýge ınvestıtsııalyq sýbsıdııalar 50 paıyzǵa ulǵaıtyldy. Sondaı-aq jabdyqty ımporttaý men negizgi qyzmet túrleri boıynsha salyqtardan bosatý kózdelgen, — dedi Premer-mınıstr.
Buǵan deıin Premer-mınıstr óńdeý ónerkásibiniń qazirgi ósý qarqyny ekonomıkany tolyqqandy ártaraptandyrý úshin jetkiliksiz ekenin aıtqan edi.