Qazaqstan trassalarynda jańadan 4 medıtsınalyq-qutqarý pýnkti ashylady

NUR-SULTAN. QazAqparat – QR Premer-Mınıstri Álıhan Smaıylov jańa trassalyq medıtsınalyq-qutqarý pýnkterin iske qosý josparlaryn aıtyp berdi, dep habarlaıdy QazAqparat.

«Joldardyń apatty-qaýipti ýchaskelerin shuǵyl medıtsınalyq kómekpen qamtý deńgeıin arttyrý maqsatynda 2023-2025 jyldarǵa arnalǵan respýblıkalyq bıýdjetti qalyptastyrý sheńberinde 4 jańa trassalyq medıtsınalyq-qutqarý pýnkterin (Atyraý – 2, Aqtóbe, Jambyl oblystarynda – 1) qurý josparlanýda», - dep jazdy Á. Smaıylov depýtattyq saýalǵa bergen jaýabynda.

Onyń aıtýynsha, qazir elde 40 trassalyq medıtsınalyq-qutqarý pýnkti jumys isteıdi. Olardyń árqaısysynda arnaıy medıtsınalyq tehnıkamen, medıtsınalyq múlikpen, apatty-qutqarý jabdyqtarynyń jıyntyǵymen jaraqtalǵan reanımobıl bar.

TMQP-nyń barlyq qyzmetkerleri buryn «Salamatty Qazaqstan» (2011 – 2015 jyldary) jáne «Densaýlyq» (2016 – 2019 jyldary) memlekettik baǵdarlamalary arqyly qarjylandyrylsa, 2020 jyly Tótenshe jaǵdaılar mınıstrliginiń shtat sanynyń lımıtine engizildi jáne «Apattar medıtsınasy ortalyǵy» MM qyzmetkerleri bolyp bekitildi.

Bastapqy kásiptik daıarlyqtan ótý barysynda bolashaq polıtsııa qyzmetkerlerin alǵashqy medıtsınalyq kómek, onyń ishinde jol-kólik oqıǵasy kezinde kómek kórsetýdiń bazalyq negizderine oqytady. Jumys istep júrgen patrýldik polıtsııa qyzmetkerlerine ІІM oqý ortalyqtarynda turaqty túrde biliktilikti arttyrý kýrstary uıymdastyrylady.

Patrýldik avtomobıldi jınaqtaý tizbesine (ІІM-niń 2019 jylǵy 1 qańtardaǵy № 737 buıryǵy) keńeıtilgen dári-dármek jınaǵy bar kásibı medıtsınalyq qobdısha, órt sóndirgish, órtke qarsy tóseme, qutqarý sheńberi, keýdeshe jáne arqan (sýda qutqarýǵa arnalǵan), sondaı-aq alpınıstik qutqarý arqany kiredi.

Budan basqa, trassalyq medıtsınalyq-qutqarý pýnkterinen shalǵaı jerlerde patrýldeý oryndarynda polıtsııa avtoekıpajdary metaldy kesýge arnalǵan qolǵa alyp júretin apatty-qutqarý quraldarymen qosymsha jaraqtalady.