Qazaqstan TRASEKA Úkimetaralyq komıssııasyna tóraǵalyqty qabyldady
ASTANA. KAZINFORM – TRASEKA Úkimetaralyq komıssııasynyń 18-shi otyrysy aıasynda Qazaqstan TRASEKA Úkimetaralyq komıssııasyna tóraǵalyqty qabyldady. Tóraǵalyq kezeńinde halyqaralyq Eýropa – Kavkaz – Azııa kólik dálizin odan ári damytýǵa jáne óńirdiń tranzıttik áleýetin arttyrýǵa baǵyttalǵan aýqymdy mindetterdi iske asyrý kózdelip otyr.
Negizgi baǵyttardyń biri – TRASEKA dálizin damytýdyń 2027–2036 jyldarǵa arnalǵan strategııasyn ázirleýdi aıaqtaý. Qazaqstan qujat jobasyn qatysýshy memlekettermen birlesip pysyqtap, ony 2027 jyly Bishkekte ótetin TRASEKA Úkimetaralyq komıssııasynyń otyrysynda bekitýge usynýdy josparlap otyr.
Kólik mınıstrligi málimetinshe, ekinshi basym mindet – TRASEKA-ny reformalaýdyń jańa tujyrymdamasyn qabyldaý. Qujat jahandyq tsıfrlandyrý, halyqaralyq logıstıkalyq tizbekterdiń ózgerýi, jańa tehnologııalar men kólik túrlerin engizý, sondaı-aq tranzıttik tasymal kóleminiń artýy jaǵdaıynda kólik dálizin damytýdyń zamanaýı tásilderin aıqyndaıdy.
Osy baǵyttaǵy mańyzdy qadamdardyń biri – Astanada TRASEKA elderiniń Biryńǵaı tranzıttik ruqsaty týraly kelisimge qol qoıylýy boldy. Qujat avtotasymaldaýshylarǵa qatysýshy memleketterdiń aýmaǵy arqyly qosymsha ulttyq ruqsattardy rásimdemeı-aq júk tranzıtin júzege asyrýǵa múmkindik beredi.
Bul halyqaralyq tasymal rásimderin jeńildetip, kólik baǵyttarynyń tıimdiligin arttyrýǵa yqpal etedi.
Búginde kelisimge Qazaqstan, Qyrǵyzstan, Ózbekstan, Ázerbaıjan jáne Ýkraına qol qoıdy. Qalǵan memleketter ishki memlekettik rásimderdi júrgizýdi jalǵastyryp jatyr.
Qazaqstannyń tóraǵalyǵy kezeńinde basqa da qatysýshy elder kelisimge qosylady dep josparlanǵan.
Qazaqstannyń TRASEKA-ǵa tóraǵalyǵy eldiń Eýropa men Azııa arasyndaǵy negizgi tranzıttik-logıstıkalyq habtardyń biri retindegi rólin odan ári nyǵaıtýǵa múmkindik beredi.
Sonymen qatar Úkimetaralyq komıssııasynyń 18-otyrysynda uıymnyń Bas hatshysy Aset Asavbaev alty jyldyq qyzmetiniń qorytyndysyn shyǵaryp, uıym aıasynda júzege asqan negizgi bastamalar men jetistikterdi tanystyrǵan edi.
