Qazaqstan tranzıttik júk kólemin 100 mln tonnaǵa jetkizýdi kózdeıdi — Toqaev
ASTANA. KAZINFORM – Bul týraly Qasym-Jomart Toqaev birinshi «Ortalyq Azııa – Koreıa Respýblıkasy» sammıtinde aıtty.
Prezıdent kólik-logıstıka áleýetin nyǵaıtýdy taǵy bir basymdyq dep sanaıdy. Memleket basshysynyń pikirinshe, jahandyq jetkizý tizbeginde túbegeıli ózgerister bolyp jatyr.
Osy tusta Shyǵys pen Batysty baılanystyratyn mańyzdy býyn retinde Ortalyq Azııanyń róli arta tústi.
— Qazaqstan óz aýmaǵy arqyly tasymaldanatyn tranzıttik júk kólemin 100 mıllıon tonnaǵa deıin jetkizýdi kózdeıdi. Bul rette Transkaspıı halyqaralyq kólik baǵdaryn damytýǵa aıryqsha mán beremiz, ony Orta dáliz dep te jıi ataıdy. Sońǵy alty jylda osy kólik dálizimen tasymaldanatyn júk kólemi bes ese ulǵaıdy. Taıaý jyldary baǵyttyń ótkizý qabiletin 20 mıllıon tonnaǵa deıin jetkizýge nıettimiz. Bizdiń oıymyzsha, Orta dálizdi kólik salasyndaǵy TRIPP bastamasymen ıntegratsııalaýǵa bolady. Lıanıýngan portyndaǵy qazaq-qytaı logıstıkalyq termınaly arqyly Ortalyq Azııa mýltımodaldi joldarymen júk jetkizetin Koreıanyń da atalǵan koordınattar júıesine qatysy bar. Sondyqtan bul baǵyttardyń áleýetin biriktirip, Koreıadan Ortalyq Azııa arqyly Eýropaǵa shyǵatyn kólik-logıstıka tizbegin qalyptastyrýǵa bolady dep oılaımyn. Osy oraıda, Pýsan porty men Kaspıı aılaǵyndaǵy Qazaqstan porttary arasyndaǵy tájirıbe men aqparat almasý baǵytyndaǵy tyǵyz yntymaqtastyq jańa múmkindikke jol ashady, — dedi Memleket basshysy.
Qasym-Jomart Toqaev energetıkalyq qaýipsizdiktiń mańyzyna nazar aýdaryp, Qazaqstan kómirsýtegi óndirisi boıynsha álemdik kóshbasshylardyń sanatyna kiretinin, jyl saıyn elimizde 100 mıllıon tonnaǵa jýyq munaı óndiriletinin aıtty.
— Osy saladaǵy yntymaqtastyq aıasyn keńeıtýge, sonyń ishinde Koreıaǵa energııa resýrstaryn jetkizýdi qaıta jandandyrýǵa ázirmiz. Sonymen qatar geologııalyq barlaý jáne jer qoınaýyndaǵy jańa kenishterdi ıgerý baǵytynda yqpaldastyq aıasyn keńeıtýge bolady. Oń tájirıbe bar. Mysaly, Koreıanyń KNOC ulttyq kompanııasy Qazaqstandaǵy munaı ken ornyn tabysty ıgerip jatyr. Hyundai Engineering kompanııasy konsortsıým quramynda iri gaz óńdeý zaýytynyń qurylysyna qatysýda. Shıkizatty tereń óńdeý salasynyń da keleshegi zor. Qazaqstan munaı-gaz hımııasyn, sonyń ishinde polıpropılen, polıetılen óndirisin damytýdy belsendi túrde qolǵa aldy. Koreıalyq kompanııalardy qosylǵan quny joǵary jańa óndiris oryndaryn ashýǵa shaqyramyz. Jahandyq energetıkadaǵy ózgeris atom ónerkásibin ilgeriletý máselesi ózekti ekenin kórsetti. Biz KHNP jáne Doosan Enerbility kompanııalarymen ıadrolyq tehnologııa salasynda anaǵurlym tyǵyz yntymaqtastyq ornatýǵa ázirmiz, — dedi Qazaqstan Prezıdenti.
Aıta ketelik Qasym-Jomart Toqaev Seýl elimizdiń úzdik on saýda seriktesiniń qataryna kiretinin aıtqan edi.
