Qazaqstan tranzıttik júkterdi kedendik tekserý merzimin qysqartpaq
QR Parlamenti Senatynyń Ekonomıkalyq saıasat, ınnovatsııalyq damý jáne kásipkerlik turaqty komıtetiniń keńeıtilgen otyrysynda «Qazaqstan Respýblıkasyndaǵy kedendik retteý týraly» QR Kodeksi men oǵan ilespe zań jobasyn tanystyrǵan elimizdiń Ulttyq ekonomıka birinshi vıtse-mınıstri Rýlan Dálenovtiń aıtýynsha, qazirgi qoldanystaǵy kodekste kedendik tranzıtti aıaqtaý 24 saǵattyń ishinde qarastyrylǵan.
«Jańa kodekste bul protsedýralardy aıaqtaýǵa 4 jumys ýaqyty saǵatynan aspaıtyn merzim belgilengen. Tranzıttik júkterdi kedendik tekserý júrgizý merzimi qajet bolǵan jaǵdaıda onnan bes kúnge deıin qysqartylady», - dedi ol.
Birinshi vıtse-mınıstrdiń aıtýynsha, Qazaqstan Respýblıkasynyń jańa Keden kodeksiniń negizin Eýrazııalyq ekonomıkalyq odaqtyń jańa Keden kodeksi qurady. Birinshi kezekte bul eki qujattyń ornyna bir qujatty paıdalanýdyń yńǵaıly bolýyna baılanysty.
«Sebebi kodeks jobasynda Eýrazııalyq ekonomıkalyq odaqtyń Keden kodeksiniń erejeleri tolyǵymen ımplementatsııalanǵan, ulttyq zańnamaǵa silteme normalary kórsetilgen, sonymen qatar Eýrazııalyq ekonomıkalyq odaqtyń kodeksinde rettelmegen quqyqtyq qatynastar belgilengen», - dedi ol.
Aıta keterligi, jańa kodekspen birge oǵan ilespe zań jobasy da ázirlengen. Ol 6 kodeks pen 29 zańǵa ózgeristerdi kózdeıdi.
