Qazaqstan transshekaralyq ózender máselesinde IYU-nyń alańyn paıdalanýǵa nıetti
ASTANA. 13 shilde. QazAqparat /Rýslan Ǵabbasov/ - Búgin Astanada Islam yntymaqtastyǵy uıymyna qatysýshy elderdiń Sý strategııasyn ázirleý boıynsha Konsýltatıvti toptyń ekinshi otyrysy bastaldy.
Atap aıtqanda atalǵan alqaly jıynnyń maqsaty- Islam yntymaqtastyǵy uıymy memleketterimen sý resýrstaryn paıdalaný bolashaǵy tujyrymdamasyna negizdelip otyr.
Basqosý barysynda QR Aýyl sharýashylyǵy vıtse-mınıstri Marat Tolybaev aýyz sý kez-kelgen memlekette strategııalyq mańyzdy resýrstar bolyp tabylatynyn aıta kele, ýaqyt óte kele onyń qundylyǵy arta túsetinin, sondaı-aq qazirgi kezde kóptegen ǵalymdar aýyz sýmen qamtamasyz etý máselesin energetıkalyq resýrstarmen qamtamasyz etýmen qatar qoıyp otyrǵandyǵyn qadap aıtty.
Vıtse-mınıstrdiń sózine qaraǵanda, Sý strategııasyn ázirleý Qazaqstan úshin ózekti bolyp tabylady. Atap aıtqanda, elimizdegi sýdyń 60 paıyzy transshekaralyq ózenderden keledi. «Bul turǵyda Islam yntymaqtastyq uıymyna kiretin Ózbekstan, Tájikstan, Qyrǵyzstan elderimen, ıaǵnı, bizdiń ońtústik kórshilerimizben budan ary qaraı kelissózderdi jalǵastyrýda Islam yntymaqtastyq uıymy alańyn paıdalaný óte mańyzdy»,-dedi M. Tolybaev.
