Qazaqstan transplantatsııa ınfraqurylymyn keńeıtip jatyr
ASTANA.KAZINFORM - Qazaqstan transplantatsııa salasyn damytýda sheteldiń ozyq tájirıbesine súıenip otyr. Sońǵy jyldary júzdegen dáriger halyqaralyq ortalyqtarda bilimin jetildirdi, sondaı-aq elimizde transplantatsııany úılestirý júıesi de jańǵyrtylyp jatyr.
Bul týraly OKQ ótken baspasóz májilisinde Transplantatsııany jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyqtyń dırektory Aıdar Sıtkazınov aıtty.
Onyń sózinshe, sońǵy jyldary elimizdegi transplantatsııa qyzmeti jekelegen joǵary tehnologııalyq operatsııalar jasaýmen ǵana shektelmeı, aǵza donorlyǵyn úılestirýdiń tutas ulttyq júıesin qalyptastyrý deńgeıine deıin damydy. Qazir Qazaqstanda 11 transplantatsııa ortalyǵy jumys isteıdi jáne transplantatsııany úılestirýdiń úsh deńgeıli júıesi jolǵa qoıylǵan.
– Sońǵy eki jylda elimizdegi transplantatsııa ortalyqtarynyń sany 7-den 11-ge deıin artty. Sonymen qatar halyqaralyq ozyq tájirıbege negizdelgen donorlyq aǵzalardy alý jáne transplantatsııalaý úderisin úılestiretin ulttyq júıe qalyptastyryldy. Búginde bul júıege 11 transplantatsııa ortalyǵy, 40-tan astam donorlyq uıym, 5 HLA-zerthanasy, sanıtarııalyq avıatsııa qyzmeti, 3 respýblıkalyq úılestirýshi, 20 óńirlik úılestirýshi jáne 30 statsıonarlyq transplant-úılestirýshi kiredi, - dedi ol.
Aıdar Sıtkazınovtyń sózinshe, dál osyndaı tıimdi úılestirý júıesi álemde transplantatsııa salasynyń tabysty damýynyń negizgi alǵysharttarynyń biri sanalady.
– Halyqaralyq yntymaqtastyq damyp keledi, zamanaýı tehnologııalar engizilip jatyr, transplantatsııa operatsııalarynyń sany turaqty túrde artyp keledi. Sońǵy jyldary júzdegen dáriger Belarýs, Túrkııa, Germanııa jáne basqa da elderdiń jetekshi klınıkalarynda taǵylymdamadan ótip, halyqaralyq standarttardy meńgerdi. Sonymen qatar elimizde transplantatsııalyq úılestirý júıesi kúsheıtilip, óńirlik jáne respýblıkalyq úılestirýshilerdiń jumysy jetildirilý ústinde, – dedi ol.
Eske salaıyq, elimizde donorlyq aǵzaǵa muqtaj 4739 adam transplantatsııa kezeginde tur. Olardyń 125-i — balalar.
