Qazaqstan Transkaspıı halyqaralyq kólik baǵdarynyń áleýetin qalaı kúsheıtpek
ASTANA. KAZINFORM - Memleket basshysy Mediterranean Shipping Company aǵa vıtse-prezıdenti Edýard Zıgrıstti qabyldady, dep habarlaıdy Aqordanyń bapasóz qyzmeti.
MSC basshylyǵymen kezdesý barysynda kólik jáne logıstıka salasyndaǵy ózara tıimdi yntymaqtastyq perspektıvasy talqylandy.
Júk aınalymyn arttyrýǵa aıtarlyqtaı septigin tıgizetin konteınerleý deńgeıin ulǵaıtýǵa erekshe nazar aýdaryldy.
Prezıdent konteınerlik tasymaldaý boıynsha álemdegi kóshbasshylardyń biri sanalatyn kompanııanyń Qazaqstan naryǵyndaǵy qyzmetine joǵary baǵa berip, búginde Orta dálizdi damytý elimiz úshin strategııalyq basymdyq sanalatynyn atap ótti.
Qasym-Jomart Toqaev Edýard Zıgrıstke Transkaspıı halyqaralyq kólik baǵdarynyń áleýetin kúsheıtý baǵytyndaǵy naqty sharalar týraly málimet berdi.
Atap aıtqanda, Ázerbaıjan jáne Grýzııa elderimen birge biryńǵaı uzaqmerzimdi tarıf modelin engizý máselesi pysyqtalyp jatyr.
Kaspıı teńizindegi júk kemeleri flotyn keńeıtý, Ázerbaıjanmen birlesip teńiz tabanyn tereńdetý, sondaı-aq Quryq portyn jańǵyrtý sekildi negizgi ınfraqurylym jobalary qolǵa alyndy.
Bul rette Memleket basshysy kompanııanyń Kaspıı jaǵalaýyndaǵy port ınfraqurylymyna ınvestıtsııa salýǵa qyzyǵýshylyǵyn quptap, mundaı jobalar atalǵan baǵyttyń básekege qabilettigin eleýli túrde arttyratynyn, Azııa men Eýropa arasyndaǵy júk tasymaly kóleminiń ósimine yqpal etetinin aıtty.
MSC aǵa vıtse-prezıdenti Memleket basshysyna kompanııanyń uzaqmerzimdi ınvestıtsııalyq jospary týraly baıandady. Onyń aıasynda logıstıkalyq termınaldarǵa, temir jol aktıvterine, port ınfraqurylymyna jáne teńiz qyzmetterine, sondaı-aq Qazaqstan Respýblıkasyndaǵy áýe arqyly júk tasymalyna qarjy quıý qarastyrylǵan.
Osyǵan deıin Qazaqstannyń Inditex tobynyń elimizdegi qyzmetin keńeıtýdi josparlap otyrǵany týraly jazdyq.
