Qazaqstan І toqsanda elektr energııasy boıynsha profıtsıtke shyqty
ASTANA. KAZINFORM — 2026 jyldyń birinshi toqsanynyń qorytyndysy boıynsha Qazaqstannyń energetıkalyq júıesi negizgi kórsetkishterdiń turaqty oń dınamıkasyn kórsetti. Bul týraly Energetıka mınıstrligi málim etti.
Alǵashqy 3 aıda elektr energııasyn óndirý kólemi 33,7 mlrd kVt·saǵ qurady, al tutyný 33,6 mlrd kVt·saǵ jetti. Osylaısha, generatsııa profıtsıti 100 mln kVt·saǵ deńgeıinde qamtamasyz etildi, bul energııa júıesiniń teńgerimdi jumysyn rastaıdy.
Aǵymdaǵy jyly Qazaqstanda dástúrli jáne jańartylatyn energııanyń 2,6 GVt qýatyn paıdalanýǵa berý josparlanyp otyr. Bıyl 4 bý-gaz qondyrǵysy, 2 jel elektr stantsııasy, 4 kún elektr stantsııasy iske qosylyp, eki elektr stantsııasyn keńeıtý josparlanǵan.
Bul jobalardy iske asyrý 2027 jyldyń birinshi toqsanynyń sońyna qaraı eldegi energııa tapshylyǵy máselesin tolyq sheshýge, al 2029 jylǵa qaraı elektr energııasynyń turaqty profıtsıtine shyǵýdy qamtamasyz etýge múmkindik beredi.
Aıta keteıik, buǵan deıin Qazaqstan «jasyl» energııaǵa kóshý arqyly ınvestıtsııalyq tartymdylyqty arttyryp otyrǵanyn jazdyq.
