Qazaqstan Tokıoda ınvestorlar quqyǵyn qorǵaý tájirıbesin tanystyrdy
ASTANA. KAZINFORM — Japonııanyń Tokıo qalasynda Azııa damý bankiniń ınstıtýty uıymdastyrǵan «Investorlar men memleketter arasyndaǵy daýlardy retteý tetikterin (ISDS) ınstıtýtsıonalızatsııalaý jáne medıatsııa júıelerin nyǵaıtý» taqyrybynda halyqaralyq dóńgelek ústel ótip jatyr.
Bas prokýratýranyń Investorlardyń quqyqtaryn qorǵaý komıteti baspasóz qyzmetiniń aqparatyna sáıkes, sharaǵa Azııa-Tynyq muhıty aımaǵy elderiniń delegattary, sonyń ishinde Koreıa, Armenııa, Ózbekstan, Fılıppın, Brýneı, Bangladesh, Mońǵolııa jáne Qyrǵyzstan ókilderi, sondaı-aq ıÝNSITRAL men HKAS sııaqty halyqaralyq uıymdardyń ókilderi jáne medıatsııa, arbıtraj jáne ınvestıtsııalyq quqyq salasyndaǵy jetekshi sarapshylar qatysty.
Komıtet tóraǵasy Baýyrjan Eraly ınvestorlardyń quqyǵyn qorǵaý boıynsha qazaqstandyq tájirıbeni tanystyryp, ınvestıtsııalyq daýlardy retteýdiń jańa tetikterin engizý týraly aqparat berdi.
— Búgingi dıalog ınvestıtsııalyq daýlardy retteý salasyndaǵy úzdik tájirıbelermen almasýǵa arnalǵan mańyzdy halyqaralyq alańǵa aınaldy. Biz úshin bul kezdesýde ınvestorlardyń quqyǵyn qorǵaýda Qazaqstannyń medıatsııany qoldaný tájirıbesin tanystyrý erekshe mańyzdy. Bul Qazaqstannyń ınvestıtsııalyq ahýaldy qorǵaýdyń zamanaýı ári tıimdi tetikterin júıeli túrde damytyp kele jatqanyn kórsetedi, — dedi Baýyrjan Eraly.
Dıalogqa qatysýshylar ınvestıtsııalyq saladaǵy qaqtyǵystardy azaıtý jáne quqyqtyq ortanyń boljamdylyǵyn arttyrýda medıatsııanyń tıimdi qural retindegi róliniń artyp kele jatqanyn atap ótti.
Sondaı-aq, ınvestıtsııalardy qorǵaý tetikterin jetildirý jáne daýlardy retteýdiń turaqty júıelerin damytý úshin halyqaralyq tájirıbe almasýdyń mańyzy erekshe ekeni aıtyldy.
Osyǵan deıin Qazaqstan kóshi-qon saıasatyn mamandar men ınvestorlardy tartýǵa baǵyttap jatqanyn jazdyq.
