Qazaqstan Toǵyzqumalaq Federatsııasynyń prezıdenti saılandy
ASTANA. KAZINFORM — Respýblıkalyq Toǵyzqumalaq Federatsııasy prezıdenti bolyp Ákim Tursun saılandy, dep habarlaıdy federatsııanyń baspasóz qyzmeti.
Al buǵan deıin respýblıkalyq federatsııany basqarǵan qoǵam qaıratkeri Álıhan Báımenov uıymnyń Qurmetti prezıdenti bolyp bekitildi. Sonymen birge Báımenov Dúnıejúzilik Toǵyzqumalaq Federatsııasy prezıdenti qyzmetin jalǵastyrady.
Astanada ótken respýblıkalyq federatsııanyń jıynynda Álıhan Báımenov osy kúnge deıin Respýblıkalyq Toǵyzqumalaq Federatsııasy vıtse-prezıdenti qyzmetin atqarǵan Ákim Tursundy federatsııa basshysy qyzmetine usyndy. Otyrysqa qatysqan óńirlik federatsııa jetekshileri, toǵyzqumalaq qaıratkerleri jáne Federatsııa basshylyq quramy usynysty qoldap, Tursundy QR Toǵyzqumalaq Sporty Federatsııasy prezıdenti laýazymyna saılady.
Aıta ketý kerek, Álıhan Báımenov respýblıkalyq federatsııany 2004-2025 jyldar aralyǵynda basqardy. Sondaı-aq bul basqosýda Federatsııanyń vıtse-prezıdentteri laýazymyna Batyrbek Qulekeev, Sholpan Qadyrova, Maqsat Shotaev, Dáýlet Ábdikárimov saılandy. Maqsat Shotaev vıtse-prezıdenttikpen birge Dúnıejúzilik Toǵyzqumalaq federatsııasynda bas hatshy qyzmetin atqarady. Bul rette, federatsııanyń qurmetti prezıdenti, prezıdent, vıtse-prezıdent jáne bas hatshy qyzmetteri — qoǵamdyq negizdegi jumys. Al QR Toǵyzqumalaq Sporty federatsııasy PR dırektory laýazymyna jýrnalıst Rıshat Asqarbekuly taǵaıyndaldy.
Otyrys barysynda Dúnıejúzilik Toǵyzqumalaq Federatsııasynyń prezıdenti Álıhan Báımenov jınalǵandarǵa 2024 jyly atqarylǵan jumystar men sharalardyń esebi boıynsha aqparat berdi.
— Ótken jyl ulttyq zııatkerlik oıynnyń erekshe damý jyly bolǵanyn jáne 5-shi Dúnıejúzilik kóshpendiler oıyny eldegi tarıhı oqıǵalardyń biri ekenin atap ótti. Bul jyly dástúrli júzdegen sharamen qatar tyń jáne iri jańalyqtar mol boldy, — dep atap ótti vedomstvo.
Bul sharalar Dúnıejúzilik jáne Qazaqstan Toǵyzqumalaq federatsııasy men óńirlerdegi toǵyzqumalaq federatsııalarynyń, QR Týrızm jáne sport mınıstrliginiń, Oqý -aǵartý mınıstrliginiń, Sportty qoldaý qorynyń jáne jergilikti ákimdikterdiń, sport basqarmalarynyń tyǵyz áriptestigimen toǵyzqumalaq janashyrlary demeýshi kásipkerlerdiń qoldaýy arqasynda júzege asyryldy.
Buǵan deıin Ásel Dalıeva toǵyzqumalaqtan 12 dúrkin álem chempıony atanǵanyn jazǵan edik.