Qazaqstan toǵyz elmen eńbek kelisimin maquldap jatyr

ASTANA. KAZINFORM — Qazir qol qoıylyp, jumys istep turǵan 10 eńbek kelisimi bar, olardyń basym bóligi TMD elderi. Bul týraly Eńbek jáne halyqty áleýmettik qorǵaý mınıstri Svetlana Jaqypova málim etti. 

— Qazir shetelde eńbek etip júrgen jáne shetelde jumys isteýge nıetti qazaqstandyqtardy aqparattandyrý jumysy júrgizilip jatyr. Mysaly, migration.enbek.kz portalyna kirip, baratyn eldi tańdasańyz, mindetti túrde sol el týraly málimet, eńbek zańnamasy jóninde anyqtama jáne eńbek etip júrgen elde eńbek jáne áleýmettik kepildikti qorǵaý úshin ne isteý qajettigi týraly nusqaýlyq alasyz. Barlyq málimet ashyq. Búginde shetelde júrgen qazaqstandyqtar ınternet arqyly portalǵa kirip, tolyqqandy keńes ala alady, — dedi Svetlana Jaqypova Májilistiń jalpy otyrysynan keıin ótken baspasóz máslıhatynda.

Mınıstrdiń aıtýynsha, qazir Qatar memleketimen eńbek kelisimin ratıfıkatsııalap jatyr. 

— Sonymen qatar búginde memlekettik organdardyń kelisim rásiminen ótip jatqan 9 kelisim bar, olar maquldanǵannan keıin Májiliske engizýge daıynbyz. Qazir qol qoıylyp, jumys istep turǵan 10 eńbek kelisimi bar, olardyń basym bóligi TMD elderi. Al alys shetelderden Vetnam, Ulybrıtanııamen memorandýmǵa qol qoıdyq, endi tolyqqandy kelisimge kóship jatyrmyz. Sondaı-aq Slovakııa, Chehııa, Japonııa bar. Túrkııamen kelisimge qol qoıýǵa talpyndyq, alaıda Túrkııa ekijaqty kelisimnen bas tartyp, Túrki memleketteri uıymy aıasynda kelisimge qol qoıýdy usynyp otyr. Mınıstrlik atalǵan baǵyttaǵy jumysty jalǵastyrady, — deıdi vedomstvo basshysy.

Búgin Májilis eń tómengi jalaqyny belgileý týraly zańdy qabyldady. 

Odan bólek Májilistiń jalpy otyrysynda Koreıada zańsyz júrgen qazaqstandyqtardyń máselesi qaraldy.