Qazaqstan TMD jáne Shyǵys Eýropa elderi arasynda memlekettik qyzmet salasyndaǵy reformalardyń kóshbasshysy dep tanyldy
ASTANA. 25 maýsym. QazAqparat - Mádenıet jáne aqparat mınıstrliginde Birikken Ulttyq Uıymy Bas Assambleıasynyń sheshimimen belgilengen Memlekettik qyzmet kúnine arnalǵan jınalys ótti,
dep habarlady vedomstvonyń baspasóz qyzmetinen.
Mınıstrliktiń basshysy Darhan Myńbaı: «BUU belgilegen kún uıymǵa múshe memleketterdi osy kúni memlekettiń damýyndaǵy memlekettik qyzmettiń úlesin nasıhattaý úshin arnaıy sharalardy uıymdastyrýǵa bastaıdy», - dep atap ótti jıyn barysynda.
Sonymen qatar mınıstr 1999 jyly Qazaqstanda Memlekettik qyzmet isteri agenttigi qurylyp, «Memlekettik qyzmet týraly» Zańnyń qabyldanǵanyn eske salyp, Qazaqstanda burynǵy keńestik keńistikte alǵash ret memlekettik qyzmetke konkýrstyq irikteý engizilgenin, memlekettik laýazymdardyń saıası jáne ákimshilik bolyp bólinip, memlekettik qyzmetshilerdi kásibılendirý jónindegi sharalar iske asyrylǵanyn tilge tıek etti. Osynyń arqasynda Qazaqstan TMD jáne Shyǵys Eýropa elderi arasynda memlekettik qyzmet salasyndaǵy reformalardyń kóshbasshysy dep tanyldy.
« Elimizdiń memlekettik basqarý júıesinde Mádenıet jáne aqparat mınıstrliginiń alatyn orny bólek. Onyń aıǵaǵy sońǵy jyldary mádenıet, aqparat, ishki saıası turaqtylyq, tilderdi damytý, muraǵat jáne baspa isi salalaryndaǵy elimizdiń jetistikteri, olardyń básekelestikke qabilettiligin nyǵaıtýǵa baǵyttalǵan sharalardy ataýǵa bolady», - dedi D.Myńbaı.
Búgingi tańda Mınıstrlikte barlyǵy 169 qyzmetker jumys isteıdi, olardyń orta jasy - 37 jas. Qyzmetkerlerdiń 61% - áıelder, 51 memlekettik qyzmetshiniń eki joǵary bilimi, 6 adamnyń ǵylymı ataǵy bar. Mınıstrlik qyzmetkerleriniń ortasha memlekettik qyzmet ótili 7 jyl, al 27 qyzmetkerdiń memlekettik qyzmet ótili 15 jyldan asady. Mınıstrlik ishindegi kareralyq ósý boıynsha sońǵy 3 jyl kóleminde joǵary turǵan laýazymǵa árbir besinshi qyzmetshi kóterildi.
Sondaı-aq, mınıstrlikte shyńdalǵan birqatar bilikti mamandardyń elimizdiń joǵarǵy memlekettik organdarynda, atap aıtqanda Prezıdent Ákimshiligi, Premer-Mınıstr Keńsesi, Parlament apparattarynda jemisti eńbek etip jatqanyn D.Myńbaı maqtanyshpen atap ótti.
Kezdesý sońynda mınıstr memlekettik qyzmet ardagerlerine, memlekettik qyzmettiń qalyptasýyna úles qosqan bir top qyzmetkerlerin marapattady.
