Qazaqstan TMD jáne musylman elderi arasynda tuńǵysh bolyp osynaý qurlyqtyq sharany - Qysqy Azıadany ótkizip otyr - Elbasy
ANA. 30 qańtar. QazAqparat - Memleket basshysy Nursultan Nazarbaev 7-Qysqy Azııa oıyndarynyń ashylý saltanatyna qatysty, dep habarlady Prezıdenttiń baspasóz qyzmetinen.
Azıadanyń ashylý saltanaty Elordadaǵy «Astana-Arena» sport kesheninde ótti.
Prezıdent óz sózinde barsha adamzattyń jartysy turatyn Azııa qurlyǵy úshin bul jarys bıylǵy jyldyń eń mártebeli sport merekesi ekenin atap ótti. "Qazaqstan TMD jáne musylman elderi arasynda tuńǵysh bolyp osy qurlyqtyq sharany ótkizip otyr",- dedi N. Nazarbaev.
- Meniń shaqyrýymdy qabyl alyp, baıraqty básekeniń ashylýyna kelgen mártebeli meımandarǵa rızashylyq bildiremin. Azııa Olımpıadalyq Keńesiniń prezıdenti Ahmad ál-Fahad ál-Sabah myrzaǵa jáne Halyqaralyq Olımpıada Komıtetiniń prezıdenti Jak Rogge myrzaǵa alǵys aıtamyn. Olımpıadalyq oıyndar búginde elder men halyqtar arasyndaǵy dostyqtyń altyn arqaýyna aınaldy. Baıyrǵy baıtaq mekende bizdi Azıada rýhy jaqyndastyra túsedi dep senemin, - dep atap ótti Memleket basshysy.
Azııa oıyndary Astana men Almaty qalalarynda qatar ótkiziletin bolady. Oıyndardyń urany: «Maqsaty birdiń - rýhy bir». Búgin Eýrazııa keńistigindegi beıbitshilik pen kelisimniń berekeli besigine balanǵan Astanada olımpıada alaýy jaǵyldy. Munda álemdik deńgeıdegi jańa sport nysandary boı kótergen bolatyn. Solardyń biri - oıyndardyń ashylý saltanaty ótken, 30 myń kórermenge arnalǵan «Astana-Arena» stadıony. Bıylǵy jyly qysqy Azııa oıyndary tarıhynda alǵash ret qatysýshy elderdiń sany jıyrma jetige jetti. Myńǵa jýyq sportshy sporttyń 11 túri boıynsha jarys jolyna shyǵady.
- Sportta shekara joq, ol halyqtardy baýyrlastyrady. Biz jańa ǵana Azııa Olımpıadalyq Keńesi týynyń kóterilip, sport sańlaqtary men tóreshilerdiń ant berý rásimine kýá boldyq. Men dúbirli dodada ádildik ústem bolyp, has júıriktiń báıgeden kelýin tileımin. Jankúıerler úshin esten ketpes qyzyqty shaqtar mol bolsyn. Qazaq jerindegi Azıadanyń izgilik alaýy dostyqtyń máńgi jalaýyna aınalsyn, - dedi Nursultan Nazarbaev.
Sóz sońynda Memleket basshysy 7-Qysqy Azııa oıyndaryn saltanatty túrde ashyq dep jarııalady.
Azııa oıyndary jarystarynyń jalpy baǵdarlamasyna sporttyń 11 túri engizilgen: konkı jarysy sporty, mánerlep syrǵanaý, shaıbaly hokkeı, dopty hokkeı (bendı), shańǵy jarystary, bıatlon, tuǵyrdan shańǵymen sekirýler, taý shańǵysy, frıstaıl, short-trek, shańǵymen sporttyq baǵdarlaý. Barlyǵy 69 medaldar jıyny sarapqa salynady.
