Qazaqstan TMD-nyń Salyqtyq tergeý organdary basshylarynyń úılestirý keńesine tóraǵalyq etedi
ASTANA. KAZINFORM - Almaty qalasynda TMD elderiniń Salyqtyq (qarjylyq) tergeý organdary basshylarynyń úılestirý keńesiniń (STOBÚK) 23-otyrysy ótti.
Otyrysqa Ázirbaıjan, Armenııa, Belarýs, Qyrǵyzstan, Reseı, Tájikstan men Ózbekstannyń salyqtyq (qarjylyq) tergeý organdarynyń basshylary qatysty.
Sonymen qatar jıynǵa TMD Atqarýshy komıtetiniń Bas hatshysynyń orynbasary Nurlan Seıtımov basshylyǵymen delegatsııa qatysty.
Jıyndy Qarjylyq monıtorıng agenttiginiń Tóraǵasy Janat Elımanov ashty.
Keńes otyrysynda tóraǵalyqtyń Belarýsten Qazaqstanǵa aýysatyny jarııalandy.
STOBÚK tóraǵasy bolyp QR QMA tóraǵasynyń orynbasary Qaırat Bıjanov, al teń tóraǵalar retinde Salyqtyq (qarjylyq) tergeý organdarynyń basshylary Belarýs Respýblıkasynan Andreı Sambýk pen Armenııa Respýblıkasynan Vaan Charhıfalakıan saılandy.
Qatysýshylar TMD memleketteriniń salyqtyq tergeý organdarynyń ekonomıkalyq qaýipsizdikti qamtamasyz etý qyzmetin jáne aldaǵy kezeńge arnalǵan jumys josparlaryn talqylady.
Basqosýda vedomstvoaralyq ózara is-qımyl mehanızmderi jáne ekonomıkalyq quqyq buzýshylyqtarmen, sonyń ishinde zańsyz aqsha aınalymy, zańsyz oıyn bıznesimen kúres salasyndaǵy yntymaqtastyqty nyǵaıtý máseleleri qaraldy.
Delegatsııa basshylary tsıfrlyq aktıvterdi, krıptovalıýtalardy paıdalaný arqyly jasalatyn qylmystarǵa, sondaı-aq ınternet-alaıaqtyqqa, qarjylyq pıramıdalarǵa jáne dropperlerge qarsy kúres boıynsha tájirıbelerimen bólisti.
Keńes músheleri úshin kún tártibindegi erekshe másele ekstremızm men terrorızmdi qarjylandyrýǵa baılanysty qylmystarmen kúres boıynsha qabyldanyp jatqan sharalardy jáne yntymaqtastyqty talqylaý boldy.
Sonymen qatar, taraptar Keńeske qatysýshy elderdegi kadrlyq qyzmetkerlerdiń bilimin jáne kásibı daǵdylaryn arttyrý máselelerine erekshe nazar aýdardy.
Jańadan saılanǵan tóraǵa Qaırat Bıjanov Qazaqstan Keńes aldyna qoıylǵan mindetterdi oryndaý úshin bar kúsh-jigerin salatynyn jáne yntymaqtastyqtyń basym baǵyttaryn barynsha tıimdi júzege asyrýǵa umtylatynynyn atap ótti.
