Qazaqstan TMD-nyń Ónerkásiptik saıasat jónindegi keńesine tóraǵalyq etedi
ASTANA. KAZINFORM — Ersaıyn Naǵaspaev TMD elderiniń ónerkásiptik keńesiniń tóraǵasy bolyp saılandy, dep habarlaıdy Ónerkásip jáne qurylys mınıstrliginiń baspasóz qyzmeti.
Ónerkásip jáne qurylys mınıstri Ersaıyn Naǵaspaev Astanada Eýrazııalyq ekonomıkalyq forým aıasynda ótken TMD-ǵa qatysýshy memleketterdiń Ónerkásiptik saıasat jónindegi keńesiniń XII otyrysyna qatysty. Otyrysta kooperatsııany tereńdetý, tehnologııa salasynda áriptestikti damytý jáne ónerkásipte turaqty óndiristik tizbekterdi qalyptastyrý perspektıvalary talqylandy.
QR Ónerkásip jáne qurylys mınıstri alqaly jıynǵa qatysýshylarǵa arnaǵan óziniń quttyqtaý sózinde atalǵan halyqaralyq uıymnyń elder arasyndaǵy saýda-ekonomıkalyq jáne mádenı-gýmanıtarlyq baılanystardy damytýdaǵy mańyzdy rólin atap ótti.
— Byltyrǵy qazan aıynda ótken TMD-ǵa múshe memleketter basshylary keńesiniń otyrysynda Qazaqstan Respýblıkasynyń Prezıdenti Qasym-Jomart Kemeluly Toqaev birlesken óndiristerdi iske qosý jáne negizgi salalardaǵy kooperatsııalyq baılanystardy keńeıtý máselelerine basymdyq berý qajettigin atap ótken edi. Biz bul tásildi Dostastyqqa qatysýshy memlekettermen ózara is-qımyl sheńberinde dáıekti túrde iske asyryp kelemiz. Muny ekonomıkalyq naqty kórsetkishter de dáleldeıdi, — dep atap ótti Ersaıyn Naǵaspaev.
Ónerkásiptik ónim boıynsha Qazaqstannyń TMD elderimen taýar aınalymy ótken jyly $35,6 mlrd-ty qurady. Sońǵy bes jylda Qazaqstannyń TMD elderimen ónerkásiptik taýarlar saýdasy 20%-ǵa ósti. Seriktes eldermen birlesip jalpy quny 56 mlrd dollar bolatyn 276 ónerkásiptik joba iske asyryldy jáne bir bóligi pysyqtalýda. Bul shamamen 79 myń jumys ornyn qurýǵa múmkindik beredi. Qazaqstandyq tarap ónerkásiptik damýdy odan ári nyǵaıtý jáne ıntegratsııanyń tıimdiligin arttyrý úshin jańa bastamalardy iske asyrýǵa daıyn.
Otyrys barysynda Ónerkásip jáne qurylys mınıstri TMD-ǵa múshe memleketterdiń Ónerkásiptik saıasat jónindegi keńesiniń tóraǵasy bolyp saılandy. Ersaıyn Naǵaspaev Keńestiń tıimdiligin odan ári arttyrý maqsatynda áriptes eldermen syndarly ózara is-qımylǵa daıyn ekenin rastady.
Otyrysta elektronıka ónerkásibin damytý, salalardy tsıfrlyq turǵyda transformatsııalaý, mashına jasaý, metallýrgııa, tamaq ónerkásibi sektoryndaǵy kooperatsııany keńeıtý jáne basqa da baǵyttar boıynsha qyzý pikir almasý boldy. Sonymen qatar TMD-nyń bazalyq uıymdarynyń qyzmetine nazar aýdaryldy.
Jıyn qorytyndysy boıynsha TMD-ǵa múshe memleketter arasyndaǵy ónerkásiptik yntymaqtastyqty nyǵaıtýǵa baǵyttalǵan birqatar qujatqa qol qoıyldy.
Eýrazııalyq ekonomıkalyq forým aıasynda Qazaqstan Respýblıkasy Ónerkásip jáne qurylys mınıstri Ersaıyn Naǵaspaev Iran Islam Respýblıkasy Saýda, ónerkásip jáne jer qoınaýyn paıdalaný mınıstri Mohammad Atabakpen kezdesti. Kezdesýde ónerkásiptik kooperatsııany damytý jáne óńdeý ónerkásibinde birlesken jobalardy iske asyrý máseleleri talqylandy. Mashına jasaý, munaı hımııasy, qurylys ındýstrııasy jáne t. b. salalardaǵy yntymaqtastyqty keńeıtýge áleýet bar ekeni atap ótildi.
Kezdesý qorytyndysynda taraptar barlyq perspektıvaly baǵyttar boıynsha ózara is-qımyldy nyǵaıtýǵa kelisti.
Buǵan deıin Ersaıyn Naǵaspaev qurylys salasynda quqyqtyq retteý nelikten tómendegenin túsindirdi.
