Qazaqstan TMD elderiniń arasynda alǵash ret dárilik zattardy retteý júıesine qol jetkizdi
ASTANA.KAZINFORM - Qazaqstan TMD elderiniń arasynda alǵash ret jáne Eýropa óńirinde tórtinshi bolyp Dúnıejúzilik densaýlyq saqtaý uıymynyń baǵalaýy boıynsha dárilik zattardyń aınalymyn ulttyq retteý júıesiniń úshinshi jetilý deńgeıine qol jetkizdi.
Bul nátıje júıeniń dárilik preparattardyń sapasy, qaýipsizdigi jáne tıimdiligi boıynsha halyqaralyq standarttarǵa sáıkestigin rastaıdy. Atalǵan jetistik Almaty qalasynda ótken Úndistan–Qazaqstan farmatsevtıkalyq bıznes-forýmy barysynda atalyp ótti.
Forýmǵa dárilik zattar, farmatsevtıkalyq shıkizat, medıtsınalyq buıymdar, vaktsınalar men bıotehnologııalyq ónimder óndiretin Úndistannyń 60-tan astam farmatsevtıkalyq kompanııalary qatysty. Úshinshi jetilý deńgeıine qol jetkizý Qazaqstannyń dárilik zattardy retteý ulttyq júıesiniń tirkeý, sapany baqylaý, farmakologııalyq qadaǵalaý jáne óndiristerdi ınspektsııalaý boıynsha halyqaralyq talaptarǵa sáıkes keletinin bildiredi.
Bul halyqaralyq uıymdar, ınvestorlar men óndirýshiler tarapynan qazaqstandyq farmatsevtıkalyq júıege degen senimdi arttyrady. Densaýlyq saqtaý mınıstrligi farmatsevtıka salasyn damytý, ınvestıtsııalar tartý, zamanaýı tehnologııalardy engizý, dárilik zattar aınalymy protsesterin tsıfrlandyrý, sondaı-aq satyp alý rásimderiniń ashyqtyǵy men tıimdiligin arttyrý boıynsha júıeli jumystar júrgizip jatyr.
2025 jyly árbir patsıent úshin dárilik qamtamasyz etýdiń qoljetimdiligi men tıimdiligin arttyrý Densaýlyq saqtaý mınıstrliginiń basty basymdyǵyna aınaldy. Búginde 3,6 mln adam TMKKK jáne MÁMS sheńberinde tegin dárilik zattarmen qamtamasyz etildi.
Bul 262,9 mlrd teńge somasyna 15,6 mln retsept. Dárilik preparattardyń tizbeleri jańartyldy: tıimsiz dáriler alynyp tastalyp, zamanaýı jáne ınnovatsııalyq preparattardyń úlesi arttyryldy.
Aıta keteıik, qazaqstandyqtar qandaı preparattardy jıi satyp alatyny belgili boldy.
