Qazaqstan TMD elderimen qoǵamdyq densaýlyq saqtaý salasyndaǵy yntymaqtastyqty nyǵaıtady
ASTANA. KAZINFORM – Búgin Senattyń jalpy otyrysynda «Táýelsiz Memleketter Dostastyǵyna qatysýshy memleketterdiń qoǵamdyq densaýlyq saqtaý salasyndaǵy sanıtarııalyq-epıdemıologııalyq sıpattaǵy tótenshe jaǵdaılardyń aldyn alý jáne olarǵa den qoıý jónindegi yntymaqtastyǵy týraly kelisimdi ratıfıkatsııalaý týraly» Zańy maquldandy.
Zańnyń maqsaty - 2022 jylǵy 28 qazanda Astana qalasynda qol qoıylǵan atalǵan kelisimdi ratıfıkatsııalaý. Qujat Táýelsiz Memleketter Dostastyǵyna qatysýshy memleketterdiń qoǵamdyq densaýlyq saqtaý salasyndaǵy yntymaqtastyqty jáne bıologııalyq qaterlerge qarsy is-qımyldyń ujymdyq júıesin damytýdyń quqyqtyq negizderin nyǵaıtýǵa baǵyttalǵan.
Senattyń Áleýmettik-mádenı damý jáne ǵylym komıtetiniń málimetine qaraǵanda, kelisimniń erejeleri tótenshe jaǵdaılardy joıý boıynsha TMD memleketterine kómek tártibin reglamentteıdi, sondaı-aq mamandandyrylǵan epıdemııaǵa qarsy brıgadalar qurýdy kózdeıdi jáne jumystyń negizgi baǵyttaryn, sondaı-aq olardy Táýelsiz Memleketter Dostastyǵy elderinde paıdalaný sharttaryn aıqyndaıdy.
Kelisimge sáıkes mamandandyrylǵan epıdemııaǵa qarsy brıgada jumysynyń negizgi baǵyttary: ınfektsııalyq aýrýlardyń qozdyrǵyshtaryn anyqtaý, qaýipti ınfektsııalyq aýrýlardyń epıdemııalyq oshaqtaryn oqshaýlaý jáne joıý jónindegi epıdemııaǵa qarsy is-sharalardy júrgizýge qatysý, suraý salýshy Tarap memleketiniń medıtsınalyq uıymdaryna konsýltatıvtik-ádistemelik ári praktıkalyq kómek kórsetý eskerilgen.
Qujat epıdemııaǵa qarsy brıgadany tótenshe jaǵdaı aımaǵyna kóshirý, memlekettik shekara arqyly basymdyqpen ótkizý, jabdyqtar men shyǵys materıaldary tranzıti, jeke quramnyń eńbegine aqy tóleý jáne olardy saqtandyrý, tamaq jáne ornalasqan jerdi qorǵaý máselelerin retteıdi.
Zań qabyldanǵannan keıin qoǵamdyq densaýlyq saqtaý salasyndaǵy sanıtarııalyq-epıdemıologııalyq sıpattaǵy tótenshe jaǵdaılarǵa monıtorıng jáne shuǵyl den qoıý júıesin qalyptastyrý baǵytynda ońtaılar nátıjeler bolady dep eskerilgen.
