Qazaqstan TMD elderimen birlesip shegirtkege qarsy kúrespek
ASTANA. KAZINFORM — TMD-ǵa múshe elderdiń shegirtke zalalynyń aldyn alý boıynsha kelisim jobasy ázirlendi. Qujat jobasy «Ashyq NQA» portalynda jarııalandy.
Aýyl sharýashylyǵy mınıstrligi ázirlegen kelisimniń maqsaty — qatysýshy memleketterde fıtomonıtorıng jáne ósimdikterdi qorǵaý jónindegi uıymnyń birlesken is-qımylyn úılestirý jáne júzege asyrý, shegirtkege qarsy óńdeýge deıin jáne odan keıin adam densaýlyǵy men qorshaǵan ortany saqtaý.
— Kelisim jobasyn iske asyrý shegirtkeniń aýyl sharýashylyǵy ónimderine zııan keltirý qaýpin azaıtýǵa baǵyttalǵan, — delingen qujatta.
Qujat jobasy 2025 jylǵy 15 qyrkúıekke deıin qoǵam talqysyna usynylyp otyr.
Aıta ketsek, elimizdiń Aýyl sharýashylyǵy mınıstrligi shegirtke tektes zııankesterge qarsy kúres naýqanynyń sátti aıaqtalǵanyn habarlap otyr.
Eske sala ketsek, kórshi Qyrǵyzstanda shegirtkemen kúreste jańa preparat qoldanyla bastady.