Qazaqstan TMD elderiniń áleýmettik baǵyttaǵy keńesine tóraǵalyqty Armenııaǵa tapsyrdy
Otyrysqa Armenııa, Belarýs, Qazaqstan, Qyrǵyzstan, Reseı, Tájikstan, Túrikmenstan, Ózbekstan, TMD Parlamentaralyq Assambleıasy, TMD men Mońǵolııaǵa qatysýshy elderdiń Eńbek ınspektsııalarynyń óńirlik alıansy, EEK, kásipodaqtardyń jalpy konfederatsııasy, TMD memleketaralyq statıstıkalyq komıteti, beıindi bazalyq uıymdar, «Táýelsiz Memleketter ardagerleriniń (zeınetkerleriniń) qoǵamdyq uıymdarynyń dostastyǵy» Halyqaralyq odaǵynyń úılestirý keńesi, sondaı-aq TMD Atqarýshy komıtetiniń delegatsııasy qatysty.
Elimizdiń atynan Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov qatysty. Otyrysta sóz sóılegen ol TMD Atqarý komıtetiniń kómegimen Qazaqstannyń tóraǵalyq etý kezeńinde konsýltatıvtik keńes ótkizgen jumysy týraly esep berdi.
Keńestiń tóraǵalyǵy 2021 jyly Astanada ótken 34-shi otyrysta Belarýsten Qazaqstanǵa berildi. Otyrys qorytyndysy boıynsha keńes músheleri ekonomıkalyq qyzmet túrlerin, sondaı-aq áıelderdiń eńbegin paıdalanýǵa tyıym salynatyn nemese shekteletin jumys túrleriniń, kásipter men laýazymdardyń tizbesin eskere otyryp, 18 jasqa tolmaǵan adamdardyń eńbegin paıdalanýǵa tyıym salynatyn jumys túrleriniń tizbesine qatysty usynystardy maquldady.
Bıylǵy naýryz aıynda Astanada keńestiń 2017-2021 jyldardaǵy qyzmeti týraly esepti tyńdaý boıynsha otyrys, maýsym aıynda TMD-ǵa qatysýshy memleketterdiń halyqty zeınetaqymen qamsyzdandyrý salasyndaǵy ekijaqty yntymaqtastyǵyn damytý máseleleri jónindegi birinshi keńesi, al qyrkúıek aıynda Astanada áleýmettik qyzmetterdi damytý, onyń ishinde múgedektigi bar adamdardy ońaltý boıynsha birinshi halyqaralyq konferentsııa ótti.
Aqmádı Sarbasov Keńestiń basqa da jumysyn atap ótti: Eńbekti normalaý, kadrlardy daıarlaý, qaıta daıarlaý jáne biliktiligin arttyrý máseleleri boıynsha jumys toptarynyń birqatar otyrystary, sondaı-aq qazirgi ýaqytta memleketishilik kelisý kezeńinen ótip jatqan ortaq eńbek naryǵyn kezeń-kezeńimen qalyptastyrý jáne jumys kúshiniń kóshi-qonyn retteý tujyrymdamasyn ózektendirý boıynsha jumys júrgizildi.
35-shi otyrys barysynda Sarbasov Qazaqstandaǵy áleýmettik-eńbek jaǵdaıy jáne osy salada qabyldanyp jatqan sharalar týraly aqparat berdi. Sondaı-aq, vıtse-mınıstr keńestiń qatysýshylaryna platformalyq jumyspen qamtýdy zańdastyrý, jastardy jumyspen qamtýdyń belsendi sharalaryna tartý, eńbek utqyrlyǵyn uıymdastyrý, respýblıkada halyqty utymdy qonystandyrý máselelerin sheshý boıynsha júrgizilip jatqan jumystardy tanystyrdy.
Óz sóziniń sońynda Aqmádı Sarbasov konsýltatıvtik keńes tóraǵasy, QR Eńbek jáne áleýmettik qorǵaý mınıstri Tamara Dúısenovanyń atynan Armenııa Respýblıkasyna osy Keńestiń tóraǵalyǵyn tapsyryp, Armenııanyń Eńbek jáne áleýmettik máseleler mınıstri Narek Arshaqulyna jáne keńestiń 35-shi otyrysyna qatysýshylarǵa jemisti jumys tiledi.
TMD-ǵa qatysýshy memleketterdiń Eńbek, jumyspen qamtý jáne halyqty áleýmettik qorǵaý jónindegi Konsýltatıvtik Keńesiniń kelesi otyrysy 2023 jyly Reseıde ótetin bolady.
Foto: facebook.com/enbekgovkz
