Qazaqstan TMD elderi arasynda ÝEFA Kongresin alǵash ótkizgen el atanbaq
ASTANA. QazAqparat - Qazaqstan TMD elderi arasynda ÝEFA Kongresin alǵash ótkizgen el atanady, dep habarlaıdy Qazaqstannyń fýtbol federatsııasy.
ÝEFA-nyń kezekti XXXVIII Kongresi Astanada 27 naýryzda Táýelsizdik saraıynda ótedi. Tikeleı efırde ony UEFA.com saıtynan kórýge bolady. «Bul Eýropalyq fýtbol qaýymdastyqtary odaǵynyń Qazaqstanǵa degen úlken senimin bildiredi, sebebi Kongress tuńǵysh ret TMD elderinde ótpek», - dep jazady ulttyq federatsııanyń baspasóz qyzmeti.
Kongress ÝEFA uıymynyń basqarýshy organy bolyp tabylady jáne 54 múshe eldiń qaýymdastyqtary kongress otyrysynda jyl saıyn bas qosady.
Shara aıaqtalysymen ÝEFA basshysy Mıshel Platını men eýropalyq fýtbol odaǵynyń bas hatshysy Djannı Infantıno baspasóz máslıhatyn ótkizetin bolady.
