Qazaqstan TMD elderi arasynda kóshýge eń qolaıly memleket atandy
ASTANA. KAZINFORM - Qazaqstan 2026 jylǵy Immigration Index halyqaralyq reıtınginde TMD elderi arasynda birinshi orynǵa shyqty. Reıtıngti amerıkalyq Remitly kompanııasy ázirledi.
Zertteý álemniń 82 memleketin qamtyǵan. Jalpy reıtıngte Qazaqstan 53-orynǵa turaqtap, tizimge engen postkeńestik elderdiń bárinen joǵary nátıje kórsetti.
Reıtıngtegi ózge TMD elderiniń kórsetkishi mynadaı:
– Moldova – 56-oryn;
– Ázerbaıjan – 66-oryn;
– Armenııa – 74-oryn;
– Ózbekstan – 75-oryn.
Al Reseı, Belarýs, Qyrǵyzstan, Tájikstan jáne Ýkraına zertteýge engizilmegen.
Sarapshylar elderdi 34 kórsetkish boıynsha baǵalaǵan. Olar 16 negizgi sanatqa toptastyrylǵan. Baǵalaý kezinde qaýipsizdik deńgeıi, densaýlyq saqtaý men bilim berý sapasy, ekologııalyq ahýal, jumyspen qamtý múmkindigi, ómir súrý quny, turǵyn úıdiń qoljetimdiligi, qoǵamdyq kólik júıesiniń damýy, otbasylarǵa kórsetiletin qoldaý jáne mıgranttar qaýymdastyǵynyń bolýy eskerilgen.
Álemdik reıtıngte Shveıtsarııa kósh bastady.
Remitly kompanııasynyń málimetinshe, ındeks tek ekonomıkalyq kórsetkishterge súıenip jasalmaǵan. Sonymen qatar ómir sapasy, qaýipsizdik, otbasylar úshin qolaılylyq jáne mıgranttardyń jańa ortaǵa beıimdelý múmkindigi nazarǵa alynǵan.
Zertteý qorytyndysy qazirgi mıgranttar úshin ómir sapasy, qaýipsizdik, medıtsınalyq qyzmetterdiń qoljetimdiligi jáne uzaq merzimdi bolashaq qurý múmkindigi negizgi ólshem bolyp qala beretinin kórsetti.
Osy kórsetkishterdiń jıyntyǵy boıynsha Qazaqstan 2026 jyly TMD keńistigindegi kóshýge eń qolaıly el dep tanyldy.
Osyǵan deıin Qazaqstan avıatsııalyq qaýipsizdik boıynsha álemdegi úzdik 20 eldiń qataryna engenin habarladyq.
