Qazaqstan TMD-da birinshi bolyp týrızm statıstıkasyna mobıldi derekterdi engizdi
ASTANA. KAZINFORM — Qazaqstan TMD-da týrızmniń resmı statıstıkasyna mobıldi derekterdi engizgen alǵashqy el boldy, dep habarlaıdy Ulttyq Statıstıka bıýrosy.
Bul tyń qadamdy Ulttyq statıstıka bıýrosy Dúnıejúzilik banktiń qoldaýymen júzege asyryp otyr. Joba Memleket basshysynyń derekterdi basqarýda jańashyl tásilderdi engizý jónindegi tapsyrmasyna saı keledi.
Mobıldi pozıtsııalaý derekterin paıdalaný — týrıstik aǵyndardy baqylaýdyń múlde jańa deńgeıine jol ashty. Bul tásil azamattardyń naqty qozǵalysyn tirkeýge múmkindik beredi: buǵan deıin resmı statıstıkada qamtylmaǵan bir kúndik saparlar men qonaqúıde toqtamaıtyn qysqa merzimdi saparlar da endi esepke alynady. Osy arqyly týrızm derekteri anaǵurlym naqty ári jan-jaqty bola túsip, el ishindegi qozǵalysqa qatysty shynaıy kórinisti qalyptastyrady.
2023 jylǵy shildeden 2024 jylǵy shildege deıingi aralyqta uıaly baılanys operatorlarynyń biriniń derekterine negizdelgen jobanyń alǵashqy nátıjeleri birqatar mańyzdy qorytyndy shyǵarýǵa múmkindik berdi. Máselen, ishki týrıstik saparlardyń 60%-dan astamy bir kúndik saparlar ekeni anyqtaldy. Týrıstik belsendiliktiń eń joǵary deńgeıi jaz mezgili jáne merekeler kezinde — ásirese Naýryz, Jańa jyl men Jeńis kúninde baıqalǵan. Úıden tys jerde túneý sany boıynsha rekord 2024 jyldyń 21 naýryzynda, kóktemgi demalystyń kezinde tirkelgen. Astanalyqtar qashyqtyqtaǵy aıyrmashylyqqa qaramastan, kóbinese Aqmola oblysy men Almatyǵa barǵan. Jyl mezgilderine baılanysty týrıstik belsendiliktiń úsh esege deıin qubylýy týrızmdi durys josparlaýǵa jańa múmkindikter beredi.
Osy jáne ózge de máseleler Astanada ótken salalyq semınar men Dúnıejúzilik bank ókilderiniń qatysýymen uıymdastyrylǵan jumys kezdesýinde keńinen talqylandy. Halyqaralyq sarapshylar Qazaqstannyń statıstıka salasyn tsıfrlandyrýdaǵy jáne jańa derekkózderdi engizýdegi ilgerileýin oń baǵalady.
Qazaqstan mobıldi derekterdi taldaýǵa arnalǵan algorıtmderdi ázirleý baǵytynda Estonııanyń Positium kompanııasymen tyǵyz jumys istep keledi. Bul halyqaralyq seriktestikke Dúnıejúzilik bank te belsendi qoldaý kórsetip otyr. Jobaǵa bank sarapshysy, ekonomıst Metın Nebıler keńesshi retinde qatysyp jatyr.
— Qazaqstan TMD men aımaq úshin tsıfrlyq statıstıkanyń jańa úlgisin kórsetip otyr. Bul joba — jaı ǵana tehnologııa emes, týrıstik aǵymdardy esepteýge degen kózqarasty túbegeıli ózgertetin úlken serpilis, — deıdi ol.
Qazirgi tańda baılanys operatorlarymen kelisim jasasý jumysy jalǵasyp jatyr. Bul bastama mobıldi pozıtsııalaý negizindegi statıstıkany tek týrızm salasynda ǵana emes, sondaı-aq kóshi-qon kórsetkishteri boıynsha da turaqty túrde jarııalaýǵa jol ashady.
Buǵan deıin statıstıka boıynsha Astanada ruqsat etilmegen úıindilerdiń 90%-dan astamy qurylys qaldyqtary ekeni anyqtaldy.