Qazaqstan TMD-da birinshi bolyp Saýd Arabııasymen ekstradıtsııalaý boıynsha kelisimge keldi
ASTANA. QazAqparat - QR Bas prokýrorynyń orynbasary Andreı Lýkın Saýd Arabııasy Koroldiginen qylmyskerlerdi ekstradıtsııalaý nemese ol elge tapsyrý joldary týraly zań jobasyn Senatqa tanystyrdy, dep habarlaıdy «QazAqparat» HAA tilshisi.
Andreı Lýkın QR Parlament Senatynyń konstıtýtsııalyq zańnama, sot júıesi jáne quqyq qorǵaý organdary komıtetiniń otyrysynda atalǵan qujatty tanystyryp, Saýd Arabııasymen kelgen kelisimniń mazmunyn baıan etti.
«QR Prezıdetiniń Saýd Arabııasy Koroldigine jasaǵan sapary barysynda eki kelisimge qol qoıylǵan. Onyń biri Qazaqstan men Saýd Arabııasy arasyndaǵy zań buzǵan adamdardy bir-birine jetkizý máselesine negizdelgen. Atalǵan qujatta zań buzǵan adamdardy ustap berý nemese aldyrý isi qaralǵan. Eger adam áskerı nemese saıası áreketi úshin aıyptalsa nemese qylmystyq jaýapkershiliktiń merzimi ótip ketse, bolmasa sol eldiń Ulttyq qaýipsizdiktiń tutastyǵyna, qoǵamdyq tártibine nemese Konstıtýtsııaǵa qaıshy kelse ekstradıtsııalaý júzege asyrylmaıdy. Suraý joldanǵan ýaqytta ustalǵan adam tergeýde bolady. Adamdardy ekstradatsııalaýǵa bıýdjetten aqsha talap etilmeıdi. Sondyqtan, zań jobasyn qoldaýdy suraımyn», - dedi Andreı Lýkın.
Bas prokýrýra ókiliniń aıtýynsha, kelisimge kelgenge deıin de Saýd Arabııasymen birlesken jumys kúsheıip keledi. Osylaısha, ótken jyldyń jeltoqsan aıynda Saýd Arabııasy mıllıondaǵan qarjyny jymqyrǵan qazaqstandyq azamatty ustap bergen.
«Qazirgi ýaqytta qazaqstandyq sottan qashyp júrgen adam Saýd Arabııasynda joq. Saýd Arabııasynyń qylmys jasaǵan azamaty Qazaqstanda da tirkelmedi. Biraq, mundaı adamdar ustalǵan jaǵdaıda qylmyspen kúres jóninde Saýd Arabııasymen kelisim boıynsha jumys atqarylatyn bolady», - deıdi ol.
Óz kezeginde QR Parlamenti Senatynyń depýtaty Dýlat Qusdáýletov kelisimniń mańyzy zor ekenin jetkizdi. Sebebi, júıeleri múlde bólek memleketter qylmys jasaǵan adamdardy bir-birine tapsyrý týraly kelisimge kelip otyr.
«Bizdiń el zaıyrly memleket bolsa, Saýd Arabııasy Koroldigi Konstıtýtsııanyń ornyna Quranǵa, Qylmystyq kodekstiń ornyna Sharıǵatqa qulaq asatyn memleket. Bizde túrmege otyrǵyzatyn qylmystar úshin ol jaqta Sharıǵat soty arqyly qatal úkim taǵaıyndalýy múmkin. Ondaı úkimder halyqaralyq quqyqqa qaıshy keletini anyq. Eń qýantatyny, bul kelisimniń 23-babynda halyqaralyq talaptardyń barlyǵyn quptap, oǵan Saýd Arabııasy Koroldigi de qol qoıdy. Qazaqstan TMD elderi ishindegi dál osyndaı dinı qundylyqtardy alǵa qoıǵan memleketpen quqyqtyq turǵyda kelisimge kelgen birinshi memleket bolyp otyr», - deıdi Dýlat Qusdáýletov.
