Qazaqstan TMD aıasyndaǵy yntymaqtastyqty keńeıtýge múddeli - Smaıylov

ASTANA. QazAqparat – Qazaqstan TMD aıasyndaǵy yntymaqtastyqty keńeıtýge múddeli. Bul týraly TMD Úkimet basshylary keńesiniń keńeıtilgen quramdaǵy otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Ótken jyly TMD 30 jyldyq mereıtoıyn atap ótip, búginde Dostastyq damýdyń jańa kezeńine aıaq basty. Osy jyldar ishinde uıym óziniń qajettiligin dáleldep, elderimiz arasyndaǵy dostyq qarym-qatynastyń berik irgetasyna aınaldy. Kópqyrly yntymaqtastyq ózara senim, pragmatızm jáne múddeler teńgerimin saqtaý qaǵıdattaryn eskere otyryp qurylǵan», - dedi Álıhan Smaıylov.

QR Úkimet basshysy mundaı ózara is-qımyl álemdik ekonomıkada bolyp jatqan jaǵymsyz úrdisterdi tómendetýge múmkindik beretindigin, ózara tıimdi áriptestikti damytýǵa yqpal etetindigin basa aıtty..

«Uıym aıasynda qabyldanǵan is-sharalardyń arqasynda bilim berý, medıtsınalyq-áleýmettik, azamattyq-quqyqtyq sıpattaǵy kóptegen másele sátti sheshildi. Azamattarymyzdyń Dostastyq memleketteri arasynda vızasyz júrip-turý múmkindigi bar. Qazaqstan TMD-nyń belsendi qatysýshylarynyń biri retinde yntymaqtastyqty keńeıtýge, áleýetti nyǵaıtýǵa jáne onyń múmkindikterin ashýǵa múddeli», - dedi QR Premer-Mınıstri.

Foto: t.me/KZgovernment