Qazaqstan tikushaqtary nege tún qarańǵysynda órt sóndire almaıdy

ASTANA. KAZINFORM – Tótenshe jaǵdaılar mınıstri Shyńǵys Árinov órt kezinde qyzyl jalyndy óshirýge jumyldyrylatyn tikushaqtar túnde nege usha almaıtynyn aıtty.

Búgin Úkimet otyrysynda Premer-Mınıstr Oljas Bektenov mınıstrden:

«Tabıǵı órtterge qarsy táýlik boıy, onyń ishinde áýe kemelerin tarta otyryp jedel áreket etý kerek. Alaıda, Tótenshe jaǵdaılar mınıstrliginiń tikushaqtary túnde ushpaıdy. Bul máseleni qalaı sheshemiz?», - dep suraǵan edi. 

Shyǵys Árinov bul jaıttyń mınıstrlik úshin óte ózekti másele ekendigin atap ótti. 

«Aqpan aıynda bul máseleni sheshý úshin túnde de usha alatyndaı jaǵdaı jasaý jóninde tapsyrma bergen edim. Biraq, qazirgi tańda eki qıyndyq týyndaıdy. Birinshisi - ushqyshtardy oqytýdyń qymbatqa túsetindigi. Ekinshisi – tikushaqty qajetti qurylǵylarmen jabdyqtaý. Osy eki máseleni Qazavıaqutqarý aktsıonerlik qoǵam bolǵandyqtan kommertsııalyq ushýlardyń arqasynda jınaǵan qarajaty esebinen birtindep sheship jatyr. Búginde bir ushqyshty daıyndadyq. Ol nusqaýshy boldy. Bıyl bir ekıpaj tolyq daıyn bolady. Máseleni júıeli túrde sheshemiz. Bıýdjetke esh salmaq salmaımyz», - dedi Shyńǵys Árinov.