Qazaqstan terrorızmmen kúrestegi ádis-tásilderimen bólisýge jáne basqa eldiń tájirıbesin zertteýge daıyn - B.Saǵyntaev
ASTANA. QazAqparat - Respýblıkanyń ulttyq zańnamasyn halyqaralyq mindettermen sáıkesteý memlekettik saıasattyń basty baǵyty bolyp tabylady. Búgin QR Premer-Mınıstriniń Birinshi orynbasary Baqytjan Saǵyntaev qylmystyq kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń (EAT) XXIV jalpy otyrysy barysynda osylaı málimdedi, dep habarlaıdy primeminister.kz saıty.
«2008 jyly quziretti organdar - QR QM Qarjylyq monıtorıng jónindegi komıtet, quqyq qorǵaý organdary, monıtorıngti rettegishter men sýbektilerden quralǵan qylmystyq kiristerdi zańdastyrýǵa jáne terrorızmdi qarjylandyrýǵa qarsy is-qımyldyń ulttyq júıesi qurylǵan bolatyn, Ulttyq zańnamany halyqaralyq qabyldanǵan mindettermen sáıkes keltirý Prezıdent Nursultan Nazarbaevtyń «QR quqyqtyq saıasatynyń 2020 jylǵa deıingi tujyrymdamasy» baǵdarlamalyq qujatynda belgilegen memlekettik saıasattyń basty baǵyty bolyp tabylady», - dedi B.Saǵyntaev.
Úkimet basshysynyń orynbasary «Qazaqstan árdaıym óziniń sheteldik seriktesterimen barlyq máseleler boıynsha dıalogqa ashyq ekenin jáne óz ádis-tásilderimen bólisýge, álemdik zulymdyqpen kúrestegi basqa elderdiń tájirıbesin qoldanýǵa daıyn ekenin» atap ótti.
Onyń aıtýynsha, Qazaqstan turaqtylyqty saqtaý, qaýipsizdikti qamtamasyz etý, adamzat pen álemge tóngen qaýip-qaterge qarsy áreket etý boıynsha barlyq qajetti sharalardy qoldanýda. Bul terrorızm men ekstremızmge, sondaı-aq memleket pen jalpy óńirdiń negizin buzatyn qylmystarǵa qatysty.
Qarjylyq monıtorıng jónindegi komıtet 2011 jyldan bastap «Egmont» qarjylyq barlaý bólimsheleri tobynyń múshesi boldy, bul 150 elmen jedel aqparat almasýǵa múmkindik beretinin aıta ketken jón. Belsendi ózara is-qımyl men aqparattyq almasý Ulybrıtanııa, AQSh, Avstrııa, Shvetsııa, Reseı, Qyrǵyzstan, Baltyq mańy jáne basqa eldermen júrgizilýde.
