Qazaqstan terrorızmmen kúres tájirıbesin bólisýge daıyn – Prezıdent

NЬıÝ-IORK. QazAqparat – QR Prezıdenti Qasym-Jomart Toqaev BUU Bas Assambleıasy 74-shi sessııasynda sóılegen sózinde shıelenisterdi sheshý men beıbitshilikke qol jetkizýdegi kómegi boıynsha Qazaqstan tájirıbesi týraly aıtty, dep habarlaıdy QazAqparat tilshisi.

«Taıaý Shyǵystaǵy oqıǵalardy - ózara jekkórýshilik pen zorlyq-zombylyqtan azap shekken adamzat órkenıetinde bolyp jatqan oqıǵalardy úreımen baqylap otyrmyz», dep atap ótti Qasym-Jomart Toqaev BUU Bas Assambleıasynyń 74-shi sessııasynda. Onyń aıtýynsha, Qazaqstan berik beıbitshilikke jáne senimdi nyǵaıtýǵa negizdelgen ekijaqty jáne kópjaqty áreketterdi qoldaıdy.

Qazaqstan ınklıýzıvti dıalogty qoldaýǵa jaqsy mysal bola otyryp, Sırııaaralyq kelissózder úshin alań usynady. Prezıdent sondaı-aq osy kelissózdiń 13 raýndy elimizdiń astanasynda ótkenin eske saldy.

«Jeneva kelissózin tolyqtyratyn Astana protsesiniń arqasynda soǵys qımyldaryn toqtatýǵa qol jetti. Bosqyndardyń qaýipsiz oralýy úshin jaǵdaılar jasalyp, deeskalatsııa aımaqtary quryldy. Qaqtyǵystardyń joıqyn saldary bolatyny jáne terrorızm men ekstremızm týǵyzatyny belgili. Bul máselelerdi BUU qamqorlyǵymen ǵalamdyq antıterrorlyq jeli sheńberindegi birlesken is-qımyldardyń arqasynda ǵana beıtaraptandyrýǵa bolady», - dedi Memleket basshysy.

Sonymen qatar, Q.Toqaev terrorızmge qarsy is-shara retinde Qazaqstan 2045 jyly BUU-nyń 100 jyldyǵyna oraı terrorızmnen azat álemge qol jetkizý úshin Tártip kodeksin usynǵanyn atap ótip, barsha álemdi osy protseske qosylýǵa shaqyrdy.

«Bıyl Qazaqstan halyqaralyq seriktestermen birlesip, «Jýsan» arnaıy gýmanıtarlyq mıssııasyn sátti aıaqtady. Nátıjesinde terrorızm nasıhatyna aldanǵan 595 Qazaqstan azamaty, onyń ishinde 406 bala Sırııadaǵy soǵys aımaqtarynan úılerine oraldy», - dep qosty Prezıdent.

Sóz sońynda Memleket basshysy qazaqstandyq tájirıbeni basqa eldermen bólisýge daıyn ekenin bildirdi jáne qatysýshylardyń barlyǵyn osyndaı sharalar qabyldaýǵa shaqyrdy.

Avtor: Azamat Syzdyqbaev