Qazaqstan terrorızmdi qarjylandyrýǵa qarsy is-qımyldy kúsheıtedi
Otyrysta birinshi vıtse-premer «QR keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylaýǵa usynǵan bolatyn.
«Zań jobasyn ázirleý qajettigi 2021-2022 jyldary Qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl jónindegi Eýrazııalyq toptyń bizdiń eldi baǵalaýynyń ekinshi raýndyna daıyndalýǵa baılanysty týyndap otyr. Qazirgi kezde ulttyq zańnamaǵa engizilmegen birqatar jańa standarttardy zańdy túrde bekitý, sondaı-aq ótken baǵalaýdyń nátıjesinde alǵan Eýrazııalyq top eskertýlerin zańnamalyq deńgeıde joıý aldaǵy baǵalaýdan oıdaǵydaı ótýdiń kepili bolyp tabylady», - dedi ol.
Onyń atap ótýinshe, Senat qaraýyna usynylyp otyrǵan zań jobasy birneshe maqsatty kózdeıdi.
«Birinshiden, qarjy monıtorıngi rásimderine klıentti tıisinshe tekserý, ishki baqylaý júrgizý jáne kúdikti operatsııalar týraly habarlama jiberý sııaqty ózgerister usynylady. Ekinshiden, qarjy monıtorıngi salasyndaǵy ýákiletti organǵa retteýshi memlekettik organy joq qarjy monıtorıngi sýbektilerine qatysty ákimshilik quqyq buzýshylyqtar týraly hattamalardy toltyrýǵa quzyret beriledi», - dedi Álıhan Smaıylov.
Qarjy mınıstriniń aıtýynsha, úshinshiden, qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasyndaǵy ýákiletti organdar úshin halyqaralyq ózara is-qımyl rásimderi, onyń ishinde qylmystyq aktıvterdi izdestirý jáne qaıtarý boıynsha rásimder reglamentteledi. Tórtinshiden, halyqaralyq standarttardy iske asyrý maqsatynda zań jobasyna kommertsııalyq emes sektordy terrorızmdi qarjylandyrý maqsatynda paıdalanýdan qorǵaýǵa baılanysty novellalar engizildi. Talaptar erikti qarjylyq jáne basqa da qaıyrmaldyqtar úshin júginetin qaıyrymdylyq uıymdary men dinı birlestikterge qoldanylatyn bolady.
«Besinshiden, Birikken Ulttar Uıymynyń Qaýipsizdik keńesi qararlaryna sáıkes ulttyq zańnamaǵa terrorızmdi qarjylandyrýǵa jáne jappaı qyryp-joıý qarýyn taratýdy qarjylandyrýǵa jatatyn nysanaly qarjy sanktsııalarynyń mehanızmderi engiziledi. Altynshydan, Zań jobasy aıasynda Ulttyq qaýipsizdik komıteti salalyq tásil arqyly terrorıstik turǵydan osal obektilerdiń terrorızmge qarsy qorǵaýynyń tıimdiligin arttyrýǵa baǵyttalǵan túzetýler blogy ázirlendi», - dedi ol.
Onyń sózine qaraǵanda, usynylyp otyrǵan normalar aldyn alý sıpatyna ıe jáne ulttyq qarjy júıesiniń qaýipsizdigin arttyrýǵa, kásipkerlik sýbektileri men kommertsııalyq emes uıymdardy aqshany jylystatý jáne terrorızmdi qarjylandyrý maqsatynda paıdalanýdan qorǵaýǵa baǵyttalǵan.
Zań jobasyn talqylaýdan keıin depýtattar qujatty birinshi oqylymda maquldady.
