Qazaqstan terrorızm qateri tómen memleketter qatarynda tur
ASTANA. QazAqparat - Qazaqstan terrorızm qateri barynsha tómen memleketter qatarynda tur. Búgin Astanadaǵy Ortalyq kommýnıkatsııalar qyzmetindegi brıfıng barysynda ekstremızm men lańkestikke qarsy is-áreket jónindegi zertteýler nátıjesi týraly baıandaǵan saıasattanýshy Erlan Qarın osylaı málim etti.
«Jyl saıyn túrli halyqaralyq uıymdar «terrorızmniń jahandyq ındeksine» qatysty kórsetkishterdi jarııalap keledi. Atap aıtsaq, Ekonomıka jáne beıbitshilik ınstıtýty terrorıstik qaýip-qaterlerge qatysty 2011 jyly sońǵy zertteýlerin jaryqqa shyǵardy. Osy zertteýlerge qaraǵanda, Qazaqstan terrorıstik qaýip-qaterler ótkir bolyp turǵan elderge jatpaıdy, kerisinshe bul qaterge qatysty barynsha jaǵymdy memleketter qatarynda tur», - dedi Erlan Qarın.
Onyń paıymynsha, bul asa mańyzdy másele, óıtkeni, sońǵy eki-úsh jylda elimizde oryn alǵan terrorızmmen baılanysty oqıǵalarǵa sheteldik sarapshylar «Qazaqstandy táýekeli joǵary elder qataryna jatqyzatyndaı» asyǵys málimdeme jasaǵan bolatyn.
«Shynaıy jaǵdaıǵa kelsek, terrorızm qaýpin baǵalaýdyń túrli jahandyq ındeksteri boıynsha Qazaqstan lańkestik qaterler barynsha tómen memleketter qatarynda tur. Buny ár túrli ınstıtýttardyń málimetteri rastaıdy. Sonymen qatar, AQSh-ta ornalasqan asa iri taldaý-saraptamalyq ortalyǵy óz saraptaýlarynda tipti Qazaqstandy qospaǵan. Onyń sebebin óz oıymsha topshylaı ketsem, ondaı ınstıtýttar Qazaqstannyń aýmaǵynda oryn alǵan oqıǵalardy terrorıstik aktiler retinde jiktemeıdi jáne terrorıstik aktilerge jatqyzbaıdy da. Árıne, ár túrli qurylymdar bul oqıǵalardy ár túrli baǵalaıdy, degenmen olardyń basym bóliginde sarapshylardyń pikiri bir-birinen alshaq emes», - dedi E. Qarın.
