Qazaqstan Termez dıalogynda óńirlik kólik baılanysyn damytý máselesin kóterdi
ASTANA. KAZINFORM — 4–6 maýsym aralyǵynda Ózbekstanda «Beıbitshilik, ózara baılanys jáne turaqtylyq: ortaq damýdyń negizin qalyptastyrý» taqyrybymen Ortalyq jáne Ońtústik Azııa arasyndaǵy baılanys jónindegi Termez dıalogynyń ekinshi otyrysy ótti. Bul týraly Kólik mınıstrligi málim etti.
Іs-sharaǵa Ortalyq Azııa elderi, Ázerbaıjan jáne Aýǵanstan mınıstrlikteri men vedomstvolarynyń basshylary, Iran, Úndistan jáne Bangladeshtiń strategııalyq ınstıtýttary men uıymdarynyń ókilderi, sondaı-aq Azııadaǵy ózara is-qımyl jáne senim sharalary jónindegi keńes (AÓSShK), Birikken Ulttar Uıymy (BUU), Táýelsiz Memleketter Dostastyǵy (TMD) jáne Eýropalyq Odaq (EO) sekildi halyqaralyq uıymdardyń ókilderi qatysty.
Іs-sharanyń ashylý rásimi men AÓSShK-niń plenarlyq otyrysyna Qazaqstan Respýblıkasy Kólik vıtse-mınıstri Jánibek Taıjanov qatysyp, baıandama jasady.
— Óz sózinde ol jahandyq logıstıkanyń qarqyndy damyp kele jatqanyn atap ótip, Ortalyq Azııadaǵy qurlyqtyq kólik baǵyttaryn, onyń ishinde Ońtústik Azııa elderine shyǵatyn dálizderdi odan ári damytýdyń mańyzdylyǵyna toqtaldy, — dep habarlady vedomstvodan.
Sóz sońynda Jánibek Taıjanov sheteldik áriptesterin qabyldanyp jatqan sharalar týraly aqparatpen turaqty almasýǵa shaqyryp, óńir elderiniń aqparattyq júıelerin biryńǵaı bazalyq platforma aıasynda úılestirýdi usyndy.
Aıta keteik, Transkaspıı dálizi arqyly júk tasymaly 3,5 ese ósti.
