Qazaqstan tennıstiń damýy jóninen álemdegi úzdik 10 eldiń qataryna kirdi

ASTANA. KAZINFORM – Halyqaralyq tennıs federatsııasynyń (ITF) jyl saıynǵy jalpy jınalysynda 200 ulttyq delegatsııa ókilderi Qazaqstannyń atalmysh álemdik qaýymdastyqtaǵy rólin nyǵaıtýdy qoldap daýys berdi.

Qazaqstan tennıs federatsııasynan málim etkenindeı, sheshim basym kópshilik daýyspen (91 paıyz) qabyldandy. 

Eń joǵary daýys sany 12 bolsa, Qazaqstanǵa berilgen daýys sany jetiden toǵyzǵa deıin ulǵaıtyldy. Qazirgi tańda Halyqaralyq tennıs federatsııasynda 5 eldiń 12 daýysy, Qazaqstanmen birge 15 memlekettiń 9, taǵy 10 eldiń 7 daýysy bar. Endi elimiz ITF-qa yqpaly jóninen Italııa, Chehııa, Kanada, Ispanııa, Shvetsııa, Shveıtsarııa, Qytaı, Japonııa jáne basqa eldermen bir qatarda. ITF-qa kiretin elderdiń daýystary sheshim qabyldaǵan kezde álemdegi tennıstiń damýyna áser etedi. 

Osylaısha, Qazaqstan tennıstiń jalpy damý deńgeıi jóninen álemdegi 10 eldiń qataryna resmı túrde endi.

- Búkil álemniń ulttyq federatsııalarynyń halyqaralyq jınalysy eldegi tennıstiń damýyn, jasóspirimderimizdiń, eresekter ulttyq quramalarynyń jetistikterin, sondaı-aq buqaralyq sport pen tennıs ınfraqurylymynyń deńgeıin táýelsiz baǵalaý negizinde Qazaqstannyń daýysyn kóbeıtý týraly sheshim qabyldady. Endi Qazaqstan álemdegi myqty tennıs elderiniń qataryna zańdy túrde kiredi, - dedi Qazaqstan tennıs federatsııasynyń prezıdenti Bolat Ótemuratov.

Sheshim qabyldaý kezinde mynadaı faktorlar: tennıspen aınalysýshylar sany, arbadaǵy tennıstiń damýy, korttar sany, ulttyq quramalar nátıjeleri, sonyń ishinde oıynshylardyń Olımpıada, Devıs kýbogy jáne Bıllı Djın Kıng kýbogy komandalyq jarystaryndaǵy kórsetkishteri eskerildi.

Qazirgi tańda Qazaqstanda 17,5 myńnan astam bala tennıspen turaqty aınalysyp, týrnırlerge qatysýda. Elde jyl saıyn 250-den astam, sonyń ishinde 40-tan astam halyqaralyq jarystar ótkiziledi. 

Eske sala keteıik, budan buryn Elena Rybakınanyń Qytaıdaǵy jarystyń shırek fınalǵa ótkenin jazǵan edik.