Qazaqstan tennısshileri halyqaralyq týrnırdiń negizgi kezeńinde synǵa túsedi
ASTANA. KAZINFORM – Astanada «Prezıdent Kýbogy» aıasynda ótip jatqan ATP Challenger 50 sanatyndaǵy halyqaralyq týrnırdiń irikteý kezeńi aıaqtaldy. Negizgi kezeń matchtary 11 tamyzda Beeline Arena Ulttyq tennıs ortalyǵynyń korttarynda bastalady.
Jekeleı synda Qazaqstan namysyn Zańǵar Nurlanuly, Ámir Omarhanov jáne Beıbit Juqaev qorǵaıdy.
Birinshi aınalymda Nurlanuly ATP álemdik reıtınginde 326-orynda turǵan qytaılyq Fatszın Sýnmen kezdesedi. Al taǵy bir matchta qazaqstandyq tennısshiler ózara synǵa túsedi: Ámir Omarhanov pen Beıbit Juqaev ekinshi aınalym joldamasyn sarapqa salady.
Kezdesý 11 tamyz kúni saǵat 10:00-de bastalady. Osylaısha, bul juptyń jeńimpazy Qazaqstannyń ekinshi aınalymda óner kórsetýine kepildik beredi.
Juptyq synda Ámir Omarhanov Danıal Rahmatýllaevpen birge óner kórsetedi. Sondaı-aq juptyq týrnırge qatysýy tıis bolǵan Damır Jalǵasbaı men Danıel Tazabekov densaýlyq jaǵdaıyna baılanysty jarystan bas tartty.
«Prezıdent Kýbogy» (President's Cup) — Qazaqstandaǵy tarıhy tereń ári bedeldi halyqaralyq kásibı tennıs týrnırleriniń biri. Jarys Astanada 1991 jyldan beri ótkizilip keledi, al 2007 jyly halyqaralyq mártebege ıe boldy. Osy jyldar ishinde týrnır kásibı tennısti damytýǵa jáne jańa esimderdi tanytýǵa múmkindik beretin mańyzdy alańǵa aınaldy.
Ár jyldary «Prezıdent Kýbogynda» qazaqstandyq Mıhaıl Kýkýshkın men Andreı Golýbev, ýkraınalyq Ilıa Marchenko, avstrııalyq Sebastıan Ofner, Germanııa quramasynyń qazirgi kapıtany Raıner Shýttler, juptyq synda Australian Open jáne Roland Garros chempıony Ivan Dodıg, juptyq synda «Úlken dýlyǵa» týrnırleriniń eki dúrkin jeńimpazy qytaılyq Chjan Shýaı jáne basqa da tanymal tennısshiler top jarǵan.
«Prezıdent Kýbogy» kóptegen jyldar boıy jas tennısshilerdiń kásibı mansabyndaǵy mańyzdy baspaldaqtardyń biri bolyp keledi. Týrnır sportshylarǵa reıtıngtik upaı jınaýǵa, halyqaralyq deńgeıde tájirıbe arttyrýǵa jáne kásibı tennıs arenasynda ózderin tanytýǵa múmkindik beredi.
Qazaqstandyq tennısshi, álemniń 439-raketkasy Denıs Evseev Gambýrg (Germanııa) ATP Challenger týrnıriniń irikteý saıysyn sátti aıaqtaǵanyn jazǵan edik.
