Qazaqstan tennısshileri karantınnen keıingi alǵashqy oqý-jattyǵý jıynyn ótkizýde
NUR-SULTAN. QazAqparat – Şýche-Býrabaı kýrorttyq aımaǵynda Qazaqstannyń tennısten ulttyq jáne jasóspirimder quramalary oqý-jattyǵý jıynyn bastady, dep habarlaıdy QazAqparat tilshisi.
Qazaqstan tennıs federatsııasy málim etkenindeı, bıyl birinshi ret Şýche kóliniń boıyndaǵy Ulttyq parkte ornalasqan Rixos Borovoe qonaq úıinde ótetin jıyn 14 maýsymǵa deıin sozylmaq.
Munda tennısshilerdiń jattyǵýy men tamaqtanýyna, demalýyna qajetti barlyq jaǵdaı jasalǵan.
Tennısten Qazaqstan erler quramasynyń kapıtany ıÝrıı Şýkınniń aıtýynsha, jattyǵý bazasyna 30-dan astam sportshy jınaldy. Mundaǵy maqsat – sportshylardyń uzaq karantınnen keıin sheberlik deńgeıin qalpyna keltirý. Astanaǵa oralǵan soń olar qalypty jattyǵýlaryn jalǵastyrady.
Bapkerler tennısshilerdiń dene daıyndyǵyn shyńdaý, tózimdiligin, koordınatsııasyn, jyldamdyǵy men kúshin arttyrý baǵytynda jumys isteıdi.
Sonymen qatar ıÝrıı Şýkın, ıAroslava Shvedova, Elena Rybakına, Zarına Dııas sekildi tisqaqqan tennısshiler jastarmen bilim-biligi, tájirıbesimen bólisedi.
«Tennısshiler osylaısha oqshaýlanýdan shyǵý ústinde. Menińshe, olar tez arada burynǵy qalpyna kelip, qarym-qabiletterin shyńdaı túsedi», dedi tennısten Qazaqstan áıelder quramasynyń kapıtany ıAroslava Shvedova.
Bul – qazaqstandyq tennısshilerdiń karantınnen keıingi alǵashqy jıyny.
Eske sala keteıik, budan buryn halyqaralyq tennıs týrnırleri taǵy da keıinge shegerilgenin jazǵan bolatynbyz.
