Qazaqstan tennısshileri búgin tarıhı jeńiske jetti – Elena Rybakına
NUR-SULTAN. QazAqparat – Qazaqstan tennısshileriniń tarıhı jeńiske jetkenine qýanyshtymyn. Búgin Germanııanyń birinshi raketkasyn utqan Elena Rybakına osylaı aıtty, dep habarlaıdy QazAqparat tilshisi.
Onyń sózine qaraǵanda, álemniń burynǵy birinshi raketkasy Anjelıka Kerbermen oıyn ońaıǵa túsken joq.
«Men árqaısysymyzdyń sońǵy upaıǵa deıin kúresetinimizdi túsindim. Jaýapkershilik júgi de jeńil emes-ti. Degenmen óz deńgeıimdi oılasam, budan da jaqsy oınaýǵa bolar edi. Anjelıka da sony aıtar, bálkim. Óıtkeni topyraq tósenishindegi korttarǵa endi-endi kóship jatyrmyz. Sondyqtan birden tóselip ketý ońaı emes. Keshegimen salystyrǵanda, dopty onsha jaqsy bere almadym. Biraq aqyrynda jeńiske jetip, Qazaqstan quramasyna sheshýshi upaıdy syılaǵanyma qýanyshtymyn. Bizdi qoldaǵan jankúıerlerdiń bárine, sondaı-aq bolboılarǵa, uıymdastyrýshylarǵa, Bolat Jámishuly bastaǵan Qazaqstan tennıs federatsııasyna zor rızashylyǵymdy bildirgim keledi», dedi Elena Rybakına.
Eske sala keteıik, budan buryn Qazaqstan quramasynyń alǵash ret Bıllı Djın Kıng kýbogynyń fınaldyq kezeńine shyqqanyn jazǵan edik.
