Qazaqstan tennısiniń jańa býyny: Rybakınadan keıingi juldyzdar kimder

Rybakına bıyl Australian Open jáne US Open týrnırlerinde jeńiske jetip, «Úlken dýlyǵa» dodalaryndaǵy chempıondyq ataqtarynyń sanyn úshke jetkizdi. Onyń álemdik tennıstegi nátıjesi Qazaqstanda osy sport túrine qyzyǵýshylyqty arttyrǵan sebepterdiń biri bolyp otyr.

Rybakınadan keıin tennıske qyzyǵýshylyq artty

Medet Baıkenniń aıtýynsha, Rybakınanyń árbir iri jeńisinen keıin balalardyń tennıske degen qyzyǵýshylyǵy baıqalady.

— Elena 2021 jyly Ýımbldondy jeńgen kezde barlyq tennıs ortalyǵyna telefon damylsyz soǵylyp, búldirshinder jazyla bastady. Dál sol qubylysty kúni keshe qaıtadan baıqadyq. Elordada, Almatyda jáne basqa qalalardaǵy tennıs ortalyqtarynda oryn joq, kezekke tirkelgen balalar sany júzden asady, — dedi ol.

Osyǵan baılanysty federatsııa aldynda jańa tennıs ortalyqtaryn ashý, jattyqtyrýshylar daıarlaý jáne balalarǵa sapaly jattyǵý múmkindigin usyný mindeti tur.

Qazaqstan tennıs federatsııasynyń dereginshe, qazir elimizde 30 myńnan astam bala tennıspen turaqty aınalysady.

Federatsııanyń negizgi maqsattarynyń biri — tennısti balalar men jastar úshin qoljetimdi sport túrine aınaldyrý. Medet Baıkenniń aıtýynsha, bul baǵyttaǵy jumys 2007-2008 jyldary jańa kezeńge ótken.

Ol kezde tennıs jattyǵýlarynyń quny aıtarlyqtaı tómendetilip, memlekettik organdardyń qoldaýymen óńirlerde jańa ortalyqtar ashyla bastaǵan.

Qazaqstannyń jańa býynynda kimder bar?

Medet Baıken Qazaqstanda halyqaralyq deńgeıde nátıje kórsetip júrgen jas tennısshilerdiń qatary kóbeıip kele jatqanyn aıtty.

Olardyń arasynda Amır Omarhanov, Zańǵar Nurlanuly jáne Damır Jalǵasbaı bar. Omarhanov pen Nurlanuly jasóspirimder arasyndaǵy «Úlken dýlyǵa» týrnırlerinde jartylaı fınalǵa deıin jetip, úzdik tórttikten kóringen.

Al Damır Jalǵasbaı bıyl Astanada ótken halyqaralyq týrnırler serııasynyń birneshe jarysynda qatarynan jeńiske jetken. Qazir ol AQSh-taǵy Kolýmbııa ýnıversıtetine shaqyrylyp, ýnıversıtettiń stýdentter lıgasynda jáne Qazaqstan quramasy sapynda óner kórsetý múmkindigine ıe bolǵan.

Qyzdar arasynda Jibek Qulambaeva, Arýjan Saǵyndyqova jáne Asyljan Arystanbekova sekildi sportshylar ataldy.

— Qazaqstan ishinde halyqaralyq deńgeıde úlken nátıjeler kórsetip jatqan jas daryndarymyz bar. Olar áli jas. Qazir jasóspirimder sportynan eresekter arasyndaǵy kásibı tennıske endi endi ótip jatqan jastar, — dedi QTF atqarýshy dırektory.

Onyń aıtýynsha, jas sportshylardyń eresekter arasyndaǵy tennıske aýysýy — jańa ári kúrdeli kezeń. Sondyqtan jasóspirimder arasyndaǵy jetistikti kásibı deńgeıdegi nátıjemen birdeı qarastyrýǵa bolmaıdy.

Balany tennıske neshe jastan bergen durys?

Medet Baıken tennıspen 4-6 jastan bastap aınalysýǵa bolatynyn aıtty. Bul kezeńde sport balanyń dene bitiminiń durys qalyptasýyna jáne qımyl-qozǵalys daǵdylarynyń damýyna yqpal etedi.

— Tennısti 4-6 jastan bastaýǵa bolady. Al 7-8 jas — úlgerip qalatyn kezeń. Úlgermese, keıin báseke aýyr bolady. Sebebi bizde 8-9 jastaǵy balalar tolyqqandy oınap, jylyna keminde 20 aptasyn jarystarda ótkizedi, — dedi ol.

Alaıda balanyń kásibı sportqa bet burýy tek jattyǵýmen shektelmeıdi. Joǵary deńgeıdegi tennısshiniń kún tártibinde uıqy, fızıkalyq daıyndyq, qalpyna kelý jáne tamaqtaný mańyzdy ról atqarady.

Kásibı tennısshiniń bir kúni qalaı ótedi?

Federatsııa ókiliniń aıtýynsha, kásibı sportshy úshin oıanǵannan bastap uıyqtaǵanǵa deıingi ýaqyttyń ózi daıyndyqtyń bir bóligi sanalady.

— Adamnyń bulshyqetteri demalyp, qalpyna kelýi kerek. Tennısshilerge 8-9 saǵat uıyqtaǵan paıdaly dep sanalady. Korttaǵy fızıkalyq daıyndyq, raketkamen jumys bar. Kúnine keminde eki saǵattan eki jattyǵý ótkiziledi. Ol jarys kestesine jáne sportshynyń ózin qalaı sezinip turǵanyna baılanysty retteledi, — dedi Medet Baıken.

Tennıs — joǵary qarqynmen ótetin sport túri. Keıbir matchtar tórt-bes saǵatqa deıin sozylýy múmkin. Buǵan qosa kásibı tennısshilerdiń jarys kestesi óte tyǵyz.

— Bul — joǵary ıntensıvti sport túri. Joǵary kardıojúktememen bes saǵat kortta oınaý óte qıyn. Onyń ústine jarystar óte tyǵyz ótedi. Bir jylda 50 apta bolsa, tennısshiler sonyń eki aptasynda ǵana demalady. Qalǵan ýaqytta jarystan jarysqa ketedi, — dedi ol.

Tennıs qanshalyqty qoljetimdi?

Medet Baıken Qazaqstanda tennıspen aınalysý quny basqa eldermen salystyrǵanda qoljetimdi deńgeıde ekenin atap ótti.

Onyń aıtýynsha, federatsııanyń alǵashqy mindetteriniń biri — tennısti qazaqstandyqtar úshin qoljetimdi sport túrine aınaldyrý bolǵan.

Qazir óńirlerde balalar tennıspen tegin nemese tómendetilgen baǵamen aınalysa alady. Keı jerlerde aı saıynǵy tólem 20-25 myń teńge shamasynda.

— Negizgi qymbatshylyq bala kásibı deńgeıde jarystarǵa qatysyp, álemdi aralap, saparǵa shyǵatyn kezde bastalady. Sonyń ózinde balalarǵa granttar men jeńildikter qarastyrylǵan, — dedi QTF atqarýshy dırektory.

Aıta keteıik, Elena Rybakına óziniń kásibı sportshy retinde qalyptasýynda Qazaqstannyń róli týraly aıtty.