Qazaqstan tennıs týrnırlerin joǵary deńgeıde uıymdastyrady – álemniń tórtinshi raketkasy
ASTANA. QazAqparat – Qazaqstanda tennıs týrnırlerin joǵary deńgeıde uıymdastyrady. Bul týraly álemniń tórtinshi, Astana Open ATP 500 jarysynyń ekinshi raketkasy, reseılik Danııl Medvedev málim etti, dep habarlaıdy QazAqparat tilshisi.
Astana dodasynyń alǵashqy aınalymynda álemniń 40-raketkasy, ıspanııalyq Albert Ramosty 6:3, 6:1 esebimen jeńgen reseılik sportshy atalmysh jarystyń jaqsy uıymdastyrylǵanyn aıtty.
«Men munda (Qazaqstanda) alǵashqy týrnırimdi (ITF) Óskemende jas kezimde ótkizip, jeńiske jetip edim. Sondyqtan Qazaqstandy erekshe jylylyqpen eske alamyn. Osynda qaıta kelgenime qýanyshtymyn. Astana týrnıri, meıli ol ATR 250 nemese ATR 500 deńgeıinde bola ma, jarystar kúntizbesinde qalady dep úmittenemin», dedi US Open 2021 dodasynyń jeńimpazy.
D.Medvedev – Astana jarysy chempıondyǵynan basty úmitkerlerdiń biri. Onyń ústine álemniń birinshi raketkasy, ıspanııalyq Karlos Alkaras alǵashqy aınalymda-aq utylyp qaldy.
Reseılik tennısshi shırek fınalǵa shyǵý úshin álemniń 53-raketkasy, fınlıandııalyq Emıl Rýýsývýorı nemese reıtıngte 64-satydaǵy shveıtsarııalyq Mark-Andrea Hýslerdiń bireýimen talasady.
Eske sala keteıik, budan buryn Astana Open ATP 500 týrnırinde Aleksandr Býblıktiń 15 eıs jasap, ekinshi aınalymǵa shyqqanyn jazǵan bolatynbyz.
Sondaı-aq Anna Danılına Chehııadaǵy jarystyń shırek fınalyna shyqty.
Foto: www.hufsd.edu
