Qazaqstan tennıs quramasy Devıs kýbogyna daıyndyqty bastady
NUR-SULTAN. QazAqparat – Qazaqstan tennıs quramasy Devıs kýbogyna daıyndyqty bastady, dep habarlaıdy QazAqparat tilshisi.
Qazaqstan tennıs federatsııasynan málim etkendeı, komandalyq álem chempıonatynyń toptyq kezeńi 13-18 qyrkúıekte ótedi.
Glazgo (Shotlandııa) qalasynda D tobynda Ulybrıtanııa, AQSh, Qazaqstan jáne Nıderlandy komandalary synǵa túsedi.
Ulybrıtanııa korolevasy ІІ Elızavetanyń ólimine baılanysty elde on kúndik qaraly kún jarııalanǵany málim.
Hattamaǵa sáıkes osy merzimde barlyq oıyn-saýyq jáne sporttyq sharalar keıinge qaldyrylýy tıis. Alaıda úkimet bul sheshimdi jekelegen federatsııalardyń qaraýyna qaldyrdy.
Ulybrıtanııa tennıs qaýymdastyǵy Glazgoda Devıs kýbogynyń toptyq kezeńi ýaqytynda ótetinin habarlady.
Tek Qazaqstan men kort ıeleriniń 18 qyrkúıekke belgilengen matchy qashan bolatyny ázir belgisiz bolyp tur.
Eger ІІ Elızaveta sol kúni jerlense, match 19 qyrkúıekke aýystyrylady.
Qazaqstan erler komandasy tolyq quramda Glazgoǵa kelip, ázirlikti bastap ketti. Mıhaıl Kýkýshkınniń aıtýynsha, ár komandanyń da shırek fınalǵa shyǵýǵa múmkindigi bar.
«Kúni buryn aıtý qıyn. Ár quramada jekeleı jáne juptyq synda kúshti oıynshylar bar. Sondyqtan barlyq matchqa myqtap daıyndalyp jatyrmyz. Bizde tájirıbe jetkilikti, barymyzdy salamyz», dedi M.Kýkýshkın.
«Bizdiń topqa kúshti oıynshylary bar komandalar tústi. Eger ulybrıtanııalyqtarmen, nıderlandylyqtarmen buryn oınasaq, Devıs kýbogynyń fınaldyq kezeńine áldeneshe ret qatysqan amerıkalyqtarmen alǵash ret kezdespekpiz. Ár matchta barlyq sheberligimizdi kórsetip, shırek fınalǵa shyǵýǵa tyrysamyz», dedi komanda kapıtany ıÝrıı Şýkın.
Eske sala keteıik, budan buryn qazaqstandyq tennısshiniń Ispanııadaǵy týrnırdiń fınalyna shyǵa almaǵanyn jazǵan bolatynbyz.
