Qazaqstan teńizshileri men áskerı ınjenerleri halyqaralyq saıysta kúmis júldege ıe boldy (FOTO)
QR Qorǵanys mınıstrliginiń baspasóz qyzmetiniń habarlaýynsha, Qazaqstannyń Áskerı-teńiz kúshterinen halyqaralyq baıqaýǵa «Oral» korabliniń ekıpajy qatysty. Birinshi oq atý kezeńinde teńizshilerimiz barynsha upaı sanyn jınap, jaqsy nátıjeler kórsetti. Teńiz mejesi boıynsha oq atýda jaýyngerlik bólim komandıri aǵa leıtenant Shahrýh Ábdirazaqov qana nysanaǵa dóp tıgizdi.
Teńiz nysanasy boıynsha oq atýda QR QK ÁTK-niń teńizshileri áýeden laqtyrylǵan meje atyp ótýdiń buryshyna saı kelmeıtin jerde ornalasqanyna qaramastan, úzdik nátıjeler kórsetti. Alǵashqy dúrkin atystan-aq nysanaǵa dóp tıdi.
Ekinshi ómirsheńdik úshin kúresti uıymdastyrý kezeńinde áskerı qyzmetshilerimiz 1 mınýtqa RF-nyń komandasynan jeńilis taýyp, ekinshi nátıje kórsetti. Úshinshi teńiz mashyǵy men qutqarý daıyndyǵy kezeńinde QR QK ÁTK-niń teńizshileri ekinshi atandy.
Armııa halyqaralyq oıyndary - 2016 saıysynyń «Teńiz kýbogy» baıqaýynda memleketimizdiń namysyn «Oral» zymyran-artıllerııalyq korabli, korabl komandıri aǵa leıtenant Asqar Qapashov qorǵaǵanyn esterińizge sala keteıik.
«Injenerlik formýla» baıqaýynda áskerı ınjenerler qazaqstandyq komandanyń qorjynyn taǵy bir kúmis medalmen tolyqtyrdy. RF Volgograd oblysynyń Voljskıı qalasynda halyqaralyq baıqaýdyń sheshýshi kezeńi ótti. Oǵan Qazaqstan, Qytaı jáne Reseıdiń komandalary qatysty. «Injenerlik formýla» baıqaýy «Formýla 1» avtojarysynyń qaǵıdaty boıynsha uıymdastyryldy. Ekıpajdar uzyndyǵy 4 shaqyrym jyldamdyq sheńberlerinen ótip, pıt-stoptarda arnaıy ınjenerlik tapsyrmalardy oryndady.
Komandalarǵa ótkelden, tóbeshikten, temirjol aıryǵynan, mınalyq alańnan ótýge týra keldi. Baıqaýdyń aqtyq kezeńi kúrdeli boldy. Komandalar júzbeli transporterlarǵa júk mashınalaryn tıep, bir ýaqytta shartty qarsylastyń shabýylyna toıtarys bere otyryp, ózennen óte bastady. Qorytyndysy boıynsha qazaqstandyq komanda Reseı Federatsııasynyń komandasynan jeńilip, ekinshi orynǵa ıe boldy.
Odan basqa, estafeta nátıjeleri boıynsha Qazaqstannyń komandasy «QQM-nyń úzdik eseptoby» jáne «JTS-tyń úzdik ekıpajy» nomınatsııalarynda jeńimpaz atandy. 
