Qazaqstan teńgerimdi syrtqy saıasatyn tek Batyspen ǵana emes, Azııa elderimen de jalǵastyra beretin bolady

Bul týraly búgin QR Prezıdenti Nursultan Nazarbaev QR Parlamenti palatalarynyń birlesken otyrysynda Qazaqstan halqyna arnalǵan jyl saıynǵy dástúrli Joldaýynda málim etti.

Elbasynyń aıtýynsha, Qazaqstan álemdik saıasattyń bedeldi qatysýshysy retinde beıbitshilik pen qaýipsizdikti nyǵaıtý baǵytynda odan ári belsendi jumys isteıtin bolady.   

«Biz ıadrolyq qaýipsizdik ıdeıasy, ıadrosyz álem atty jalpyǵa birdeı deklaratsııasyn qabyldaý boıynsha bastama kóterdik. Aǵymdaǵy jyldyń naýryzynda Seýlde ótetin ıadrolyq qaýipsizdik taqyrybyna arnalǵan jahandyq sammıtte atalmysh deklaratsııa naqtylanyp, tolyqtyrylatyn bolady. Bıyl Astana Ekonomıkalyq forýmy úlken mańyzǵa ıe bolady. Onda biz usynyp otyrǵan «G-Global» atty álemdik daǵdarystan shyǵýdyń jobasy talqylanady dep úmittenemin», - dedi Prezıdent.  

«Qazaqstannyń syrtqy saıasat bastamalary álem qaýymdastyǵynyń úlken qoldaýyna ıe boldy. Olarda bizdiń keleshektegi onjyldyqqa arnalǵan syrtqy saıası strategııamyzdyń máni jatyr. Biz teńgerimdi  syrtqy saıasatymyzdy tek Batyspen ǵana emes, Azııa elderimen de jalǵastyra beretin bolamyz», - dedi Elbasy.

Memleket basshysy sonymen qatar, Astanada Álemdik jáne dástúrli dinder kóshbasshylarynyń IV quryltaıy ótetindigin atap ótti.  

«Biz Qazaqstan usynǵan Jahandyq energoekologııalyq strategııanyń iske asyrylýyna úlken kúsh salýymyz kerek. Biz «jasyl» tehnologııalardyń transfertine baǵyttalǵan «Jasyl kópir» atty Astana bastamasyn júzege asyrý boıynsha odan ári jumysty jalǵastyratyn bolamyz», - dedi N. Nazarbaev.