Qazaqstan teńgerimdi kópvektorly syrtqy saıasatty jalǵastyryp keledi - Máýlen Áshimbaev

ASTANA. QazAqparat – Senat tóraǵasy Máýlen Áshimbaev AQSh-tyń Qazaqstandaǵy Tótenshe jáne Ókiletti Elshisi Denıel Rozenblıýmmen kezdesti. Kezdesý barysynda eki el arasyndaǵy yntymaqtastyqty odan ári nyǵaıtý jáne strategııalyq seriktestikti keńeıtý máseleleri talqylandy. Bul týraly QazAqparat Palatanyń baspasóz qyzmetine silteme jasap habarlaıdy.

Senat spıkeri Elshi Denıel Rozenblıýmdi Qazaqstandaǵy jumysynyń bastalýymen quttyqtady. Sondaı-aq, ol elimizdiń AQSh-pen yntymaqtastyǵy bizdiń memlekettiń syrtqy saıasattaǵy, onyń ishinde parlamentaralyq baılanys boıynsha asa mańyzdy baǵyttarynyń biri ekenin aıtty.

«Biz parlamentaralyq dıalogty elderimiz arasyndaǵy strategııalyq seriktestiktiń ajyramas bóligi retinde qarastyramyz. Parlamentshilerimizdiń saparlary ózara yntymaqtastyǵymyzǵa oń serpin beredi», - dedi Máýlen Áshimbaev.

Kezdesýde taraptar parlamentaralyq qarym-qatynasty jandandyrý máselesine nazar aýdardy. Senat tóraǵasynyń aıtýynsha, amerıkalyq kongressmenderdiń Qazaqstanǵa sapary olarǵa bizdiń elde jáne óńirde bolyp jatqan oqıǵalarmen tikeleı tanysýǵa, sondaı-aq ekijaqty ózara is-qımyldy arttyratyn naqty qadamdardy aıqyndaýǵa múmkindik beredi. Sonymen qatar, Máýlen Áshimbaev Qazaqstan Prezıdenti Qasym-Jomart Toqaevtyń bastamasymen elimizde júrgizilip jatqan aýqymdy saıası jańǵyrtýlardyń nátıjelerine toqtaldy.

«Qazirgi tańda Parlament jáne bıliktiń jergilikti ókildi organdary kúsheıtilip jatyr. Biz tıimdi, táýelsiz jáne jumys isteıtin ókildi organdarsyz teńgerimdi demokratııalyq saıası júıe qurý múmkin emes degen qaǵıdaǵa taban tireımiz. Búginde Senat jumysyndaǵy negizgi basymdyq – Prezıdentimiz júrgizip otyrǵan saıası jáne ekonomıkalyq reformalardy zańnamalyq turǵydan qamtamasyz etý», - dedi Máýlen Áshimbaev.

Óz kezeginde Elshi Qazaqstanda júrgizilip jatqan qoǵamdyq-saıası jańǵyrýlardy joǵary baǵalap, amerıkalyq kompanııalar birqatar baǵyt boıynsha birlesken jobalardy iske asyrýǵa múddeli ekenin jetkizdi.

Kezdesý sońynda Palata tóraǵasy Máýlen Áshimbaev Parlament Senaty Qazaqstan men AQSh arasyndaǵy qarym-qatynasty odan ári nyǵaıtý úshin qajetti jumysty ári qaraı jalǵastyra beretinin aıtty.

Foto: senate.parlam.kz